@אידישליך - קיינער איז נישט העכער'ן געזעץ. אבער וועלכע געזעץ?
- 1000147277.jpg (86.33 KiB) געזען 3066 מאל
קיינער איז נישט העכער'ן געזעץ. אבער וועלכע געזעץ?
די גאנצע וועלט קערט זיך איבער. טראמפ איז א "קאנוויקטעד פעלאן". יאפ, דעמאקראטן יובל'ן אז ענדליך האט מען דא דערגרייכט, און רעפובליקאנער שרייען אז ליידער האט מען דא דערגרייכט.
יעדער ווייסט וועגן די קלאגעס, אבער גאר ווייניג קענען די קלאגעס זעלבסט. מען האט אים אנגעקלאגט. פיין, אבער אויף וואס? אויף וואס האט מען אים געפונען שולדיג? ער האט באצאלט האש מאני. אקעי, און וואס איז די קרימינאלע פאברעך? רוב מענטשן בלייבן דא שטיל.
אסאך שרייען אז דאס איז "פאליטישע פראסעקיושן", דאס הייסט אז מען נוצט אויס די יוסטיץ סיסטעם נאכצוגיין פאליטישע קעגנער. אנדערע, צווישן זיי פראמינענטע אנאליזירער אין די מעינסטריעם און ליבעראלע מידיע, זאגן אז בעצם זענען די קלאגעס גארנישט ווערד, און שטייען אויס צו ווערן איבערגעדרייט.
אלזא, לאמיר ארויסזומען אביסל, און צונעמען די קלאגעס, די לעכער וואס זענען פארהאן דערין, און וויאזוי די קעיס איז צוגעגאנגען.
***
די הויפט פארברעך אויף וואס מען האט אנגעקלאגט טראמפ, און געפונען שולדיג, איז פעלשן ביזנעס רעקארדס. נעמליך, ער האט באצאלט פאר זיין אדוואקאט מייקל קאהן געלט, וואס קאהן האט געהאט אויסגעלייגט צו פארשטילן אן אומבע'טעמ'טע מעשה, און אנטשטאט עס אזוי אריינשרייבן אין די ביכער, איז עס אריינגעגאנגען אלס "לעגאלע אפצאל".
קודם מוז מען וויסן אויב טראמפ זעלבסט האט געוויסט אז מען באצאלט קאהן פאר די געלט וואס ער האט אויסגעלייגט, און אז מען האט עס נישט ריכטיג פארשריבן, ווייל עס איז נישט געברענגט געווארן קיין שום באווייז דערצו. קאהן זעלבסט האט מודה געווען ביים עדות זאגן אז א חלק פון יענע צאלונג איז געווען צענדליגע טויזענטער וואס ער האט גע'גנב'עט, ממילא איז שווער צו זאגן אז טראמפ האט געוויסט גענוי וואס די געלט איז.
עס זענען אבער דא אסאך גרעסערע פראבלעמען. פעלשן ביזנעס רעקארדס איז נישט קיין פעלאני, אין בעסטן פאל איז עס סך הכל א מיסדעמינאר, פון א לעגאלע שטאנדפונקט איז עס בערך אזוי הארב ווי רויבן א באטל פעפסי פון א געשעפט. אבער עס איז ניטאמאל קיין מיסדימיענאר, ווייל כדי פעלשן רעקארדס זאל בכלל זיין א מיסדעמינאר, דארף מען עס פעלשן מיטן ציל צו "בארויבן א צווייטן". באצאלן האש מאני איז אבער נישט קיין פארברעך און קיינער איז נישט בארויבט געווארן.
זייענדיג אין דעם פראבלעם האבן די פראקורארן גע'טענה'ט אז די געלט וואס קאהן האט ארגינעל באצאלט מוז קלאסיפיצירט ווערן אלס "קאמפיין קאנטריביושן", ווייל טראץ וואס עס איז נישט געגאנגען צום קאמפיין, האט דאס געבן די האש מאני צו פארשטילן יענעם, ארויסגעהאלפן די טראמפ קאמפיין. און היות דאס איז מער ווי די סומע וואס עס איז ערלויבט פאר א פריוואטע מענטש צו געבן פאר א קאמפיין, איז דאס א פעדעראלע וואלן קאמפיין פארלעצונג, אזוי ארום איז עס בכלל א מיסדימיענאר.
איי דאס איז דאך א פעדעראלע פארלעצונג און נישט קיין סטעיט פארלעצונג? זענען די פראקורארן אויפגעקומען מיט א חידוש און אפירגעקראצט א סטעיט קאמפיין געזעץ וואס פארבאט צו "העלפן קאנדידאטן אויף אומלעגאלע וועגן", און געזאגט וויבאלד מען האט עובר געווען אויף א פעדעראלע געזעץ מיטן געבן מער געלט אלץ 'קאמפיין קאנטריביושאן", האט מען מיט דעם "אומלעגאל געהאלפן א קאנדידאט", איז דאך עס אומלעגאל לויט די ניו יארק סטעיט געזעץ.
די ניו יארקער געזעץ וואס פארבאט צו העלפן קאנדידאטן מיט אומלעגאלע מיטלען ווערט נישט גענוצט, און נאכקוקענדיג אלע קעיסעס צוריק ביז 2000 טרעפט מען עס נישט קיין איין מאל. אזוי אויך האט קיין שום פראקוראר אין די פאראייניגטע שטאטן נאכנישט געברענגט קיין סטעיט קלאגעס באזירט אויף א פעדעראלע קאמפיין פארלעצונג וואס דורכדעם פארלעצט עס אויך סטעיט וואלן געזעצן, דאס איז א גענצליך נייע חידוש פון ברעג. ווי אויך זענען דא לעגאלע עקספערטן וואס זאגן אז די סטעיט געזעץ איז נישט גילטיג אויב איז דא א פעדעראלע וואלן געזעץ, און קומט נאר אריין אין פלעצער וואו די פעדעראלע געזעץ איז בכלל נישט גילטיג.
נאך א גרעסערע פראבלעם איז, אז די "סטעטשו אוו לימיטעישאנס", דאס הייסט די צייט ביז ווען מען קען אנקלאגן אויף אזא מיסדימיענאר, איז ארום 2 יאר, און איז אפגעלאפן אום 2019. אויב זענען זיי מצליח עס ארויפצוריקן צו א פעלאני, איז עס 5 יאר, וועלכע איז שוין אויך אפגעלאפן, אבער די DA אפיס זאגט אז מען קען נאר רעכענען די 5 יאר ווען ער איז געווען אין ניו יארק, ממילא קען מען נישט אריין רעכענען די יארן וואס ער איז געווען אין וואשינגטאן אלץ פרעזידענט. אלזא האבן זיי עס געמוזט אמווייניגסטנס מאכן א פעלאני.
כדי דאס ארויפצוריקן צו א פעלאני, זענען דער פראקוראר און ריכטער אויפגעקומען מיט א חידוש. זיי זאגן אז דאס פעלשן רעקארדס האט מען געטון צו פארדעקן א צווייטע פארברעך. אויב פעלטשט מען רעקארדס כדאי צו פארדעקן א צווייטע פארברעך, אפילו יענע פארברעך איז אויך נאר א מיסדעמיענאר, ווערט עס פאררעכנט ווי א פעלאני (אגב, די נידריגסטע קלאס פעלאני, קלאס E). יעצט וועלכע פארברעך האט מען געזוכט צו פארדעקן?
האט די פראקוראר געגעבן 3 אויסוואלן; 1) פעדעראלע קאמפיין פארברעכן - אז קאהן האט געוויסט אז געבן די געלט איז א קאמפיין קאנטריביושאן, און אז עס איז מער ווי די ערלויבטע סומע, און האט דאס געזוכט צו פארדעקן. 2) טעקס פארברעכן - ער האט אריינגעשריבן פאלש כדי צו פעלשן טראמפ'ס טעקסעס. 3) פעלשן דאקומענטן - ער האט עס אריינגעשריבן אומריכטיג כדי צו פעלשן אנדערע דאקומענטן.
מיר וועלן איבערהיפן דאס אז די פראקורארן האבן בכלל נישט אויסגעזאגט וואס די 3 פארברעכן זענען, און די ליסטע פון 3 פארברעכן וועלכע די ארגינעלע קלאגעס פון פעלשן רעקארדס זענען געקומען פארדעקן, איז מען געוואר געווארן הערשט די סאמע לעצטע טאג פון די טרייעל ביי די קלאוזינג ארגומענטן, וואס דאס איז קעגן די קאנסטיטוציאנאלע רעכטן פון אן אנגעקלאגטער אז מען דארף אים מודיע זיין אויף וואס ער ווערט אנגעקלאגט.
די גרעסערע פראבלעם איז אבער אז טראמפ איז דאך קיינמאל נישט געפונען געווארן שולדיג אויף קיינע פון די 3 פון די צווייטע רייע פארברעכן, אלזא וויאזוי קען מען זאגן אז די ערשטע פארברעך, די מיסדעמינער פון פעלשן רעקארדס, איז א פעלאני צוליב וואס עס האט פארדעקט א צווייטע קריים, ווען אויף די קריים איז ער קיינמאל נישט געווארן באשולדיגט?
אזוי ווי דאס איז א שטארקע טייל פון די קלאגעס, און נאר אזוי קען ער געפונען ווערן שולדיג דערויף, האט דער ריכטער געזאגט פאר די דזשורי אין די אינסטרוקציעס וואס זיי האבן באקומען, אז כדי צו באשולדיגן טראמפ, דארפן זיי אלע זיין איינשטימיג אז "עפעס א צווייטע פארברעך" האט מען געוואלט באהאלטן, זיי דארפן אבער נישט זיין פאראייניגט וועלכע פון די 3 עס איז געווען. דאס מיינט אז עס איז דערווייל נישט געווען קיין דזשורי וואס האט זיך פאראייניגט אז טראמפ איז באגאנגען א ספעציפישע פארברעך, וואס מיטן דאס פארדעקן האט ער געטון נאך א פארברעך.
מיט דעם האט מען מיט גרויס שוועריקייט פראדוצירט א פעלאני געבויעט אויף א מיסדימיענאר וואס איז שוין אפגעלאפן, וואס אפילו זאל מען רעכענען מיט ברעג'ס זייגער, נאר ווען טראמפ האט זיך געפונען אין ניו יארק, זאגן לעגאלע אנאליסטן אז די עצם פאקט פון ארבעטן מיט א פעלאני וועלכע איז געבויעט אויך אן אפגעלאפענע מיסדימיענאר איז אויך א חידוש פאר זיך פון ברעג.
דאס איז אלעס בנוגע די קלאגעס זעלבסט.
***
דערנאך דארף מען אבער נעמען אין באטראכט נאך עטליכע פאקטן בנוגע אלעס ארום די טרייעל.
צום ערשט, מוז מען אדרעסירן דעם ריכטער, יואן מערטשען. מערטשען האט אין די פארגאנגענהייט געשאנקען געלט צו א פרא-ביידען, אנטי-טראמפ פאליטישע אפעראציע, וואס דער ריכטער האט אנגעצייכנט פאר "זיך קעגנשטעלן די רעפובליקאנער פארטיי און דאנאלד טראמפ'ס ראדיקאלע רעכטע לעגאַסי". מיט דעם האט ער פארלעצט א קלארע רול אז ניו יארקער ריכטער מעגן נישט מאכן קיין שום פאליטישע ביישטייערונגען פון סיי וועלכע סארט. ווען דער ריכטער וואלט בייגעשטייערט צו "ווידערדערוויילן דאנאלד טראמפ - מאגא 2024" וואלט דער פראקוראר ערלויבט אז ער זאל בלייבן אויף דעם קעיס? זיכער נישט.
דאס איז שוין אפגערעדט פון דעם אז דער ריכטער'ס טאכטער, לארען מערטשען, איז די פרעזידענט פון א פאליטישע מידיע גרופע וועלכע העלפט ארויס קאמפיינס, און האט אין 2020 שטארק ארויסגעהאלפן די קאמאלע העריס קאמפיין, און נאך א רייע הויערכאנגיגע דעמאקראטן, און האט ערהאלטן איבער $11 מיליאן דאלער פון די קאמפיין פון אדאם שיף, דער אויסגעשפראכענער אנטי-טראמפ קאנגרעסמאן וועלכע האט אנגעפירט די אימפיטשמענט פראצעדורן קעגן טראמפ, און נאך שווערע מיליאנען פון אנדערע דעמאקראטישע קאמפיינס, אריינגערעכנט די ווידערוויילונג קאמפיין פון פרעזידענט ביידען.
איינע פון די ארגומענטן וואס מענטשן נוצן אויב מען האט טענות אויף די דזשורי, איז אז די פארטיידיגונגס איז זיי אויך איבערגעגאנגען, פונקט ווי די פרארוארן. די אמת איז אבער אז די פארטיידיגונגס קען נאר איבערגיין לויט וואס דער ריכטער פרעגט, א שטייגער ווי דאס אז דער ריכטער האט געהייסן איבערגיין יעדע פאטענציאלע דזשוראר צו מאכן זיכער אז קיין איינס איז נישט פרא טראמפ, אבער דער זעלבער ריכטער האט נישט געלאזט פאר די פארטיידיגונגס דורכגיין די דזשורארס צו מאכן זיכער אז קיין איינס איז נישט פרא ביידען אדער אויסגעשפראכן אנטי טראמפ.
אזוי אויך דארף מען געדענקען אז קיין איין סטעיט פראסעקיוטער, אין קיין שום סטעיט, האט אין די גאנצע היסטאריע נאכנישט געברענגט פעדעראלע עלעקשאן קלאגעס ווען ס'קומט צו א סטעיט פארלעצונג, קעגן קיין איינעם, פאר קיין שום סיבה. קיין איינס.
אזוי אויך האבן פעדעראלע פראקורארן און פריערדיגע סטעיט פראקורארן פאר אלווין ברעג געעפענט און אויסגעפארשט די קעיס, אבער באשלאסן נישט צו ברענגען קיין קלאגעס אויף דעם.
און אפילו די מאנהעטן DA אפיס זעלבסט, ברענגט כמעט קיינמאל נישט קיינע קעיסעס וואו פעלשן דאקומענטן איז די איינציגסטע פארלעצונג, וואס אויף דעם איז טראמפ אנגעקלאגט געווארן.
צו פארשטיין אביסל מער איבער וואס פאר א סארט קלאגעס מען רעדט דא, איז וויכטיג צו דערמאנען אז די פעדעראלע וואלן קאמיסיע האט געעפענט אן אויספארשונג אויף די קלינטאן קאמפיין, נאך וואס עס איז באקאנט געווארן אז זיי האבן גענוצט קאמפיין געלטער צו באצאלן פאר די באקאנטע "סטיעל דאסיער" וואס האט געדארפט אויפדעקן די צוזאמארבייט צווישן טראמפ מיט רוסלאנד, און זיי האבן "געפעלטשט די רעקארדס" און עס פארצייכנט אלס לעגאלע קאסטן.
די צוויי פעלער זענען כמעט ענליך, די חילוק איז נאר אז דארט איז עס טאקע געווען א קאמפיין פינאנצן פארלעצונג, ווייל די קלינטאן קאמפיין האט גענוצט געלטער פון די קאמפיין דאס צו באצאלן, דא אבער האט עס טראמפ באצאלט פון זיין פריוואטע טאש פאר קאהן, און נישט פון קאמפיין געלטער. מען דארף צוקומען צו א גאנצע פשט'ל אז עס זאל בכלל זיין א קאמפיין פארלעצונג.
נאך א גרויסע חילוק איז, אז אין די צייט וואס דא האט מען אנגעקלאגט טראמפ פערזענליך, נישט די קאמפיין, און עס זאגאר ארויפגעריקט צו א פעלאני, האט זיך די אויספארשונג אויף די קלינטאן קאמפיין געענדיגט ווען די קאמפיין איז איינגעגאנגען צו באצאלן א שטראף פון $113,000 און ביי דעם האט זיך עס געענדיגט, טראץ דעם וואס דארט איז געווען ערגער פון דא.
אלזא, "קיינער איז נישט העכערן געזעץ" איז גאר וויכטיג, אבער עס מיינט גארנישט אויב מען טאלערירט (אדער גאר סעלעברירט) דאס פארדרייען דעם געזעץ פון דעם געווענליכע פראצעדור אנצוקומען אהין. "יוסטיץ האט געזיגט"? אדער א געוויסע יוסטיץ דעפארטמענט האט באוויזן צו פארדרייען זאכן גענוג גוט מיט די הילף פון אן אנטי טראמפ ריכטער כדי פערזענליך צו באזיגן א שונא?
