Re: וויליאמסבורג פסח חלוקה פ"ד עצות וקאמענטארן
נעכטן זונטאג זעמיר געווען אין בינגאו מיט'ן האפענונג אז צוליב די פארשליסונג פונעם BQE וועט דער וויליאמסבורגער עולם פילייכט נישט קומען אין די מאסן, אבער גאנץ שנעל אנטוישט געווארן ביים אנקומען אהין... עס איז געווען דארט איבערגעפילט עד אפס מקום, סיי מיט תושבי וויליאמסבורג [וועלכע האבן געמאכט דעם חשבון אז 'מיר זענען מסתם פון די איינציגע וומסב'גער וועלכע זענען יא געקומען טראץ דעם וואס די הייוועי איז פארשפארט..] און סיי תושבים פון בארא פארק און פלעטבוש [וועלכע האבן מסתם אויך געמאכט דעם חשבון וואס איך האב געמאכט, המובא בראש מאמרינו...]. אבער פון די צווייטע זייט איז ב"ה אזא נחת צו קוקן ווי פילע הונדערטער אידישע קינדער אנשים נשים וטף זענען עוסק מיט שמחה און יגיעה ביינאזאם אין די הכנות צום הייליגן יו"ט פסח, אשריכם ישראל! און אוודאי אשרי חלקו פון הנדבן החשוב הרב יואל שליט"א וואס טויזענטער אידישע קינדער גייען צו צום הייליגן יו"ט זמן חרותנו מיט לייכטע געמיטער! [געוויס וואלט איך אויך שטארק געקענט נוצן די קיופאן פון זיין חלוקה, אבער למעשה וואוין איך אין בארא פארק און השי"ת האט פאר יעדן צו געבן געלט אויף פסח].
וואס איך האב יא געזעהן ביי בינגא: די קעסטלעך טרויבן וואס איך קויף ביי אים יעדע יאר צו מאכן די מאסט, זענען אויסגעגאנגען פיל שנעלער ווי ער האט זיי אריינבאקומען, בכלל האט זיך אנגעזעהן א שטיקל מאנגל אין געוויסע רויע פראדוקטן וואס אידן וועלכע מאכן אליין דעם פסח קויפן איין, און כפי ששמעתי בשם די פארוואלטער פונעם געשעפט האבן זיי פשוט נישט געקענט נאכקומען צו ריסטאַקען די סחורה, צוליב דעם ריבוי העם בליעה"ר וואס זענען געקומען היי-יאר איינקויפן. [וואס אין דעם איז אויך שולדיג ב"ה הנדבן החשוב שליט"א]
אגב, אז מען רעדט שוין פון די טרויבן זאל דער עולם אין אכט נעמען אז די פרייזן פון טרויבן זענען געשטיגן מיט עטליכע הונדערט פראצענט דאס יאר! איך פלעג יעדע יאר נעמען די טרויבן פון בינגא וואס ער האט געהאט פאר'ן ביליגן פרייז פון 10-12 דאללאר א קעסטל, און כפי השמועה קאסט דאס היי יאר העכער 40 דאללאר א קעסטל!
לשנה הבאה בירושלים מיט אלע אידן אינאיינעם, אכי"ר!!!