הרה"ק ר' דוד מטאלנא בהרה"ק ר' מרדכי זצוקללה"ה בעמ"ח "מגן דוד", "קהלת דוד" ו"ברכת דוד" דער זעקסטער זון פון כ"ק מרן המגיד מטשערנאביל זצוקללה"ה וואס האט געפירט זיין מלוכה קודם אין וואסילקוב און נאכדעם לרבבות אלפי ישראל בעיר ממלכתו טאלנא.
צו אים איז געפארן דער גרעסטער ציבור צווישן די אכט הייליגע ברידער. כ"ק האדמו"ר מסקווירא שליט"א זאגט שטענדיג איבער פון כ"ק האדמו"ר מסקווירא ז"ל, אז דער טאלנער זי"ע האט געזאגט, אז ער איז אראפגעקומען אויף די וועלט אריינצושיינען אמונה און בטחון אין אידישע הערצער.
דער טאלנער איז אין נגלה געווען א תלמיד פונעם ברודער דער טשערקאסער זי"ע, און געפארן צום אפטער רב זי"ע לויט'ן באפעל פונעם טאטן וועגן קינדער.
ס'געווען גאר באקאנט דער שבת וואס דער טאלנער זי"ע איז געווען אין סאדיגורא. מ'האט אמאל געפרעגט איינעם פון די משתתפים, וויאזוי דער סאדיגורער זי"ע האט זיך געפירט כלפי דעם טאלנער. האט ער געענטפערט, אז דער סאדיגורער איז געווען כעבדא קמי מאריה פאר'ן טאלנער.
זיין הייליגער ברודער דער טוריסקער מגיד זי"ע האט אמאל געזאגט אין דעם יא"צ י' אייר: היינט איז דער יארצייט, ער איז געווען אן ערליכער איד. אלע נשמות פון די וועלט זענען געגאנגען דורך אים!
אמאל האט הרה"ק ר' איציקל סקווירא‘ר זי"ע געדארפט פירן טיש צוזאמען מיט'ן ברודער דער הייליגער טאלנער זי"ע, דער טאלנער איז געקומען אין צייט, אבער ר' איציקל סקווירא‘ר האט געשפעטיגט, די טאלנער חסידים האט דאס געארט, ווען ר' איציקל סקווירא‘ר איז אנגעקומען, האט דער טאלנער אים געזאגט בחביבות: סערצע ברודער, איך ווייס דו האסט די מדת הזריזות, ווייל אלע צדיקים האבן דעם מדה, נאר ווייזט אויס אז די הכנה פאר די זריזות האט געדויערט לאנג... מנו"כ בעיר טאלנא