ב"ה
מיר ליגט אין קאפ פון 'נפשי' אפאר זאכן וואס פעלן זיך אויס פאר א ADHD אז ער זאל מצליח זיין. א ADHD דארף אז אויפגאבעס זאלן אים זיין Urgent. דאס מיינט אז ער זאל פילן אז ער קען עס נישט אפשטופן אפילו מיט א סקונדע. און אז ער מוז עס יעצט אינגאנצן טון. ער האט נישט א איבעריגע סקונדע אפילו אויף צו טראכטן עפעס אנדערש.
וועלכע ארבעט קען דאס באווייזן?
נישט אז מ'זאל זיך דארפן חזר'ן אגאנצן צייט "איך האב נישט א איבעריגע סקונדע, איך האב נישט קיין איין איבעריגע סקונדע, איך האב נישט קיין איין איבעריגע סקונדע..." נאר ער זאל באמת פילן אז ער מוז יעצט דא זיין.
דאס איז אויך איינע פון די סיבות פארוואס א ADHD קען נישט אויסהערן א שיעור, ווייל ער מאכט זיך דעם חשבון, אז "אה, איך מיין אז יעצט האב איך א ליידיגע סקונדע, לאמיר געבן א כאפ אריין צו טראכטן פון עפעס אנדערש אויך, איך קום שוין צוריק..."
די קאפ פון א ADHD זוכט צו טראכטן וואס מער און ברייטער. זאגסט אים א רש"י, וויל ער אויך אריינטראכטן אין נאך דיטאלן ארום און ארום, ווי מער. איז, ווילאנג ער פילט אז ער מוז דיר געבן אטענשאן, וועט ער געבן, די רגע ער פילט אז די שטריק איז געווארן גענוג לויז, און עס פעלט שוין נישט אויס אזויפיל קאנצענטראציע, ווייל ער פארשטייט עס שוין בערך... געט ער א כאפ אריין נאך א דיטאל פון די ארומיגע ענווייראנמענט, אדער א זייטיגע דיטאל וואס האט נישט קיין שייכות אהער. דאס געשעט אין א ספליט סעקונד, אבער יענע ספליט סעקונדע געשעט די דיסטרעקשאן.
די עצה פאר דעם איז אז יעדע רגע זאל זיין Urgent. דאס מיינט אז ס'דארף זיך פילן אז איך האב נישט א ליידיגע סקונדע וועלכע איך קען אריינכאפן א זייטיגע דיטאל". דאס געשעט ווען א ADHD פאקוסירט שטארק. דאס לייגט נישט צוואנג אויפן מוח, דאס איז געשמאק פאר'ן ADHD מוח, ווייל ער פילט סיפוק.
שטיין ביי א רעדשיסטער איז אפשר Urgent, אבער דער ADHD מוח קען זיך מאכן א חשבון, אז ווילאנג איך רעכן די אייטעמס מיט מיינע הענט, קען מען אפשר טראכטן פון עפעס אנדערש וואס ציהט יעצט אויף די מינוט, און דאס נעמט אוועק די סיפוק פון א מענטש. ווייל כדי צו האבן סיפוק פון פעולות, דארף מען פילן אין די זאך. די מחשבה דארף אויך דארט זיין.
מאכן נוי סוכה פאר ביזנעס איז אפשר אינטערעסאנט, ס'איז אפשר א טשאלענדש, ס'איז אפשר א חידוש, אבער ס'איז נישט Urgent. ס'מוז נישט זיין יעצט. ס'ברעננט נישט! אפשר ערב סוכות צוויי שעה פאר'ן זמן איז א גוטע צייט...
די זעלבע איז מיט אלע סארט גרעפיקס.
א זאך וואס איז Urgent איז צום ביישפיהל א שואל ומשיב. ער מוז ענטפערן פאר בחורים, און ער מוז אריילייגן זיין גאנצע קאפ צו פארשטיין וואס דרוקט יעצט פאר'ן בחור'ל, וואו כאפט ער נישט, וואס כאפט ער נישט, (אפשר האט ער אויך ADHD...). אדער ס'איז דא אסאך ביזנעסער וואס דארפן שואל ומשיב'ס. ס'דארף אבער זיין אינטערעסאנט פאר די מענטש צו ענטפערן. דאס ווענד זיך שוין אין נאטור. אויב די נאטור שטופט אים צו העלפן מענטשן וואס דארפן הילף, דאן איז עס אינטערעסאנט.
IT, קאמפיוטער פראגרעמינג, וועב זייטליך דיוועלאפערס, איז אפשר אינטערעסאנט, אבער די Urgency ווענד זיך צי מ'דארף יעצט האלטן קאפ אויף געוויסע פראגראמען צי נישט. לאמיר זאגן א געוויסע קאמפעני וואס דארף אז מ'זאל שטיין אויפן וואך אגאנצן צייט, און ס'פילט זיך נישט אז מ'האט א איבעריגע סקונדע צו געבן א טראכט פון א פייגל וואס פליהט דורך, ווייל מ'דארף אויפקומען מיט אייגענע אפשאצונג וויאזוי מ'געט זיך יעדע סקונדע א עצה, דאן קען עס אפשר זיין א גוטע זאך.
ארבעטן אין א מצה בעקערי קען זיין שווערליך. ווייל די מוח איז מער אינטערעסירט צו כאפן א שמועס מיט א שכן וואס שטייט דערנעבן. ס'פארנעמט נישט די קאפ. אפילו אויב ס'איז טאקע Urgent פאר די הענט, ושמרתם את המצות, איז עס אבער נישט Urgent פאר די מחשבה. און נאך אביסל פאלט מען אויף עפעס א וועג ארויס פון די ארבעט, און מ'קען נישט פונקטליך אנצייגן וואס ס'שטערט.
א שטארקע עיקר אין ADHD איז די מחשבה. די פאוקוס פון די מחשבה, די מחשבה דארף זיין קאנצענטרירט און דאהי. די מחשבה איז וואס שאפט שוועריגקייטן.
זיין א רבי אין חדר אדער א מגי"ש האט זיך די Urgency ווייל מ'קען זיך נישט אדער בעסער געזאגט מ'וויל זיך נישט ערלויבן צו טראכטן פון א זייטיגע זאך, ווייל ס'איז דא גענוג און נאך אויף וואס צו האלטן קאפ, דאן קען דאס זיין גוט. מ'דארף אבער קענען מצליח זיין ב"ה. מ'דארף וויסן בערך וואס מ'גייט טון אין יעדע סארט מצב וואס קען ארויפקומען, און נישט ווערן פארלוירן, נאר טון וואס מ'האט צו טון איינס נאכן צווייטן.
די פראבלעם מיט א רבי אין חדר איז... קומען שפעט, און קומען אומצוגעגרייט. פשוט פשט ווייל פאר מ'קומט אין חדר איז נישט דא קיין Urgency. איך קען אלעס איבערלאזן פאר די לעצטע מינוט. חוץ אפשר א קינדערגארטן מלמד.
א באס רבי דארף זיין גוט, אויב מ'האט ליב קינדער.
א ADHD איז א אינטערעסאנטע פאראדאקס. אדער קוקט ער אויס ווי ער קען גארנישט. א בטלן. אפשר דרייווען א באס. און לייגן טישטוכער. אדער קען ער א וועלט מיט זאכן. דאס קומט ווייל עס ווענד זיך אין די פאר זאכן. א זאך דארף זיין Urgent. ס'דארף זיך פילן סיי פאר די מעשים, און סיי פאר די מחשבה, אז דאס מוז יעצט, אין אט די רגע, געטון ווערן. דאס איז נישט לחץ, דאס איז נישט מאניפולאציע, דאס איז נישט כפי', נאר אזא געפיל אז דאס מוז יעצט געטון ווערן.
און נאכדעם דארף דאס זיין אינטערעסאנט. אינטערעסאנט מיינט אז מ'האט א געפיל דערצו. מ'האט א נאטור דאס צו וועלן.
און ס'דארף זיין א טשאלענדש. דאס מיינט אז ס'דארף אויפוועקן די כוח וואס א ADHD האט אין זיך פון קענען אויפקומען מיט א וועג צו קענען נוצן זיינע כוחות איבערצוקומען שוועריגקייטן. דאס מאכט אז ער זאל מוזן אריינקוקן אין זיך און ארויסברענגען זיינע כוחות. אויב נישט, שלאפט עס.
און ס'דארף זיין א חידוש. א חידוש מיינט אז ס'פילט זיך אז "איך האב נאך קיינמאל נישט געקענט טון אזוי גוט ווי איך האב עס יעצט באוויזן..." ס'מוז נישט דוקא זיין באמת א נייע זאך. א נייע עקספיריענס. ווען א מענטש איז הונגעריג, אדער דארשטיג, און ער טרינקט, פילט זיך עס א חידוש. דאס מיינט: חידוש.
וויפיל מאל א מענטש האט שוין געשמעקט דעם בשמים, וועט ער דאך פילן א חידוש ווען ער שמעקט עס מוצאי שב"ק. ווייל ער איז הונגעריג דערצו. אזוי איז מיט א ארבעט. מ'קען טון די זעלבע פעולה אין איין ציה, איז עס אבער א חידוש.
א בחור קען שוין מאכן צום דריי הונדערטסטן מאל זיין אייער שפייז, אבער יעדע מאל פילט ער דעם חידוש דערין. אזוי גוט ווי איך מאך עס יעצט, איז נאך קיינמאל נישט געווען! אזוי פילט זיך עס. ס'איז א נייע דערהער.
לבי אומר לי אז ס'איז נישט אזוי שווער צו טון אין ביזנעס און מאכן געלט. ס'איז מער ווייל ס'פעלט איינע פון די פאר זאכן וואס מאכט אז זאכן זאלן זיך אנהאנקערן. א ADHD וויל עפענען א געשעפט, שוין, ער עפנט אויף, אבער ער ווערט פארנומען מיט זייטיגע זאכן, רבש"ע, ווייל א ביזנעס וואס א ADHD עפנט, דארף האבן אין זיך אזא אינגרידיענט אז מ'האט נישט א ליידיגע סקונדע. נישט זאגן "איך עפן א ביזנעס, אבער איך גיי אויך האבן צייט צו קוקן איי וועלט. נישט גוט. ס'דארף אזוי ארייננעמען דעם קאפ, אז מ'זאל נישט פילן אז מ'האט א איבעריגע סקונדע. ס'דארף האבן אין זיך די פאר זאכן.
אקעי. והשם הטוב עוזר ויעזור.
