א שטורעם ארום א דעבאטע; וואס האט יעצט פאסירט?
דער באקאנטער קאנסערוואטיווער אקטיוויסט און מוילמאכער טשארלי קירק פארציילט איבער וויאזוי ער האט אויפגענומען די דעבאטע אנזעץ: "איך האב דייקא מיטגעהאלטן דעם דעבאטע זייענדיג אליין אין צימער אן קיינעם ארום מיר, וויבאלד כ'האב געוואלט פארמירן מיין אייגענע מיינונג און פערספעקטיוו דערויף, אן ווערן באאיינפלוסט פון אנדערע. איז כ'האב מיטגעהאלטן דעם דעבאטע ווי ביידען זעצט מיאוס אן, ווי ער רעדט אז ער האט באזיגט מעדיקעיר, און זיינע אנדערע שוואכע מאמענטן. און איך טראכט צו מיר, דאס איז דאך נישט מער ווי א געווענליכן טאג אין די ווייסע הויז. אוודאי, דאס איז שלעכט, אבער די אמעריקאנע באפעלקערונג איז דאך שוין צוגעוואוינט צו דעם. און עס איז געווען פאר מיר שאקירנד צו געוואויר ווערן אז ניין, זיי זענען נישט צוגעוואוינט דערצו. וויבאלד די מעינסטריעם מידיא טוט שוין פאר די לעצטע פאר יאר אקטיוו פארדעקן ביידען'ס גייסטישע שוואכקייטן, און וואס האט יעצט פאסירט איז אז דאס מאל איז נישט געווען קיין מעגליכקייט עס צו פארדעקן. צענדליגע מיליאנען מענטשן האבן דאס מיטגעהאלטן, און די מידיא האט אנערקענט אז זיי קענען דאס מער נישט פארדעקן און ליגנט זאגן דערוועגן."
הערנדיג קירק'ס שילדערונג, טראכט איך צו מיר אז באמת האב איך געהאט אן ענליכן ערפארונג. אקעי, נישט ממש ענליך, ווייל כ'האב גראדע יא ערווארטעט אז נאך א פולע וואך זיך צוגרייטן און זיך גוט אויסרוען, און מסתם אויך פארדרייען דעם סקעדזשול אז ביידען זאל זיין וואך אין די נאכט שטונדן, וועט ער ווארשיינליך אריינקומען גאנץ גוט, אזוי ווי אין זיינע בעסערע מאמענטן. דערפאר איז עס יא געווען א היבשע שאק פאר מיר אז ער האט זיך אזוי מיאוס אויסגעגליטשט, אבער כ'האב נישט גע'חלומ'ט אז עס וועט נאכפאלגן מיט אזא רעאקציע.
יא, איך האב שטארק הנאה געהאט צו הערן ווי אלט און שוואך ער הערט זיך, און ווי ער פארלירט זיך שטארק פון מאל צו מאל. אבער אין די זעלבע צייט האב איך שטארק הנאה געהאט פון טראמפ'ס געלונגענע פערפארמענס, פיל העכער ווי מיינע ערווארטונגען, און כ'האב זיך געראכטן אז די נייעס וועט זיין אז טראמפ האט געוואונען דעם דעבאטע, און יא, אויך איבער ביידען'ס פארלוירנקייט. אבער אין וויסטן חלום איז מיר נישט בייגעפאלן בשעת'ן הערן דעם דעבאטע אז דאס וועט זיין אזא געים טשעינדזשער, און וועט ממש טוישן דעם פארמעסט אויף אזא אומגלויבליכן פארנעם. ווייל אויב ביידען'ס סימפטאמען פון אלטקייט האט גארנישט געטוישט ביז יעצט, פארוואס זאל זיך יעצט עפעס טוישן? מען וועט ווייטער פארדרייען א קאפ פארן ציבור, מען וועט זיי הייסן נישט צו גלייבן וואס זייערע אייגענע אויערן האבן געזען און געהערט, און אלעס פאר ווייטער כאילו לא הי'.
נאר וואס דען, אזוי ווי תיכף נאכן דעבאטע האט אויסגעבראכן א שטורעם אין די לינקע מידיא, און עס האבן אנגעהויבן קומען רופן פון אלע זייטן אז ביידען זאל זיך ארויסציען, האב איך שנעל פארגעסן פון מיינע מחשבות און געווארן מיטגעשלעפט מיט דעם ווינט. אבער אז איך שטעל זיך אפ פאר א רגע טראכטן מיט אן אויפריכטיגן בליק, פארשטיי איך באמת נישט וואס דא גייט פאר.
און אז איך קוק צוריק די קאמענטארן פונעם עולם דא אויף אייוועלט בשעת די דעבאטע איז אנגעגאנגען, זעה איך אויך אזא סארט רעאקציע. אוודאי איז מען געווען פארנומען מיט ביידען'ס שוואכקייט, און ספעציעל די מאמענטן ווען ער האט זיך גענצליך פארלוירן אדער נישט גערעדט צום זאך. אבער קיינער איז נישט געווען ספעציעל שאקירט, און אוודאי נישט ערווארטעט אזא שטורמישע רעאקציע.
און דאס איז אלעס וויבאלד דא אויף אייוועלט איז מען יא ערלויבט צו הערן דעם ריינעם אמת, און דערפאר איז נישט קיין נייעס פאר קיינעם פון אונז דעם פרעזידענט'ס גייסטישע שוועריגקייטן און אלטקייט סימפטאמען. און אונז, פונקט ווי קירק און אנדערע וואס האבן יא געוואוסט דעם אמת ביז היינט, זענען נישט געווארן ספעציעל איבערראשט און האבן נישט ערווארטעט אז די מידיא זאל זיך אזוי אויסדרייען דעם רוקן, ביז ווילאנג עס האט נישט פאקטיש פאסירט.
די דעמאקראטישע העקס אין די מידיא ווידעראום, זענען געכאפט געווארן אין א מיאוס'ן סורפרייז. דעם גאנצן באלאן וואס זיי בויען שוין אויף פאר יארן לאנג, און ארבעטן שווער דיר צו פארקויפן אז ביידען איז שארף און קריספי ווי אן איבערגעווארעמטע מצה, איז הילכיג צוקראכט געווארן פארנט פון זייערע אויגן און זיי ווייסן פשוט נישט וויאזוי מען עסט דאס. זיי זענען נישט פארבליבן מיט צופיל אויסוואלן. פארפאלן, לייקענען איז מער נישט קיין אפציע, עכ"פ ווילאנג עס איז נאך פריש און דאס אמעריקאנע פאלק האט נאכנישט פארגעסן וואס זיי האבן געזען.
ווי דער לינקער דעמאגאג טשאק טאד פון שקר די ען סי האט זיך אויסגעדריקט, אז דער ביידען ביים דעבאטע האט אויסגעזען אזוי ווי די בילד וואס ווערט אראפגעמאלן אין די רעכט גענויגטע מידיא. דאס הייסט, אין אנדערע ווערטער, אן אפענע הודאת בעל דין אז די א.ג. 'טשיעפ פעיק' ווידיאוס וואס די רעכטע מידיא איז ביז בלויז עטליכע טעג צוריק געווארן געפערליך אראפגעריסן פארן עס פארשפרייטן און פארנארן דעם פאלק מיט 'מיסאינפארמאציע', דאס איז אין פאקט דער ריינער אמת. און די א.ג. 'מעינסטריעם' מידיא וואס האט דיר פארזיכערט אז דאס איז אלעס פאלש און דו זאלסט נישט גלייבן וואס דיינע אויגן זעען, האבן געארבעט אווערטיים דיך צו פארקויפן דעם ברוקלין בריק מיט געבראטענע לאקשן אלס סייד דיש, און צו זייער שאנדע איז דאס אלעס אנטפלעקט געווארן פארן אמעריקאנעם פאלק דעם פארלאפענעם דאנערשטאג נאכט.
פארפאלן, אלע 'געשניטענע און געשטיקלטע ווידיאוס' האבן זיך ארויסגעשטעלט צו זיין די ריינע אמת, און דערפאר איז נישט קיין וואונדער פארוואס די שקרנים וואס האבן עס פרובירט צו באהאלטן פון דיר, מיט טיילווייזע סוקסעס, זענען אין פאניק מאוד. מען האט זיי פשוט ארויסגעשלעפט דעם קארפעט פון הונטער די פיס, פיר יאר הארעוואניע איז חרוב געגאנגען אין ניינציג מינוט.
באשיינפערליך האט געשריבן: ↑ מאנטאג פעברואר 05, 2024 1:48 amאיין זאך ווייסעך יא, איך זעה ווער ס׳שטייט אויף וועמענס צד… דאס זאגט מיר פונקטליך וואו איך זאל שטיין…