אנאליז: די צווילינג טורעמעס זענען נישט צוזאמגעפאלן!
דיסקלעימער: איך וויל קלאר מאכן אז איך בין נישט פון די פארגלייבטע אין די "ניין עילעווען אינסייד דזשאב" קאנספיראציע און איך קום נישט דא פרעדיגן זייערע ראדיקאלע שיטות, איך גיי זיך נישט באציען צו די סעפטעמבער עילעווען אטאקעס בכלליות, בלויז צו די פאטקן ארום די אומפאל פון די צווילינג טורעמעס.
שוין לאנג וואס איך מוטשע זיך צו פארשטיין וויאזוי די צוויי מאכטפולע צווילינג געביידעס זענען אין געציילטע סעקונדעס אראפגעקומען צו די פלאכקייט פונעם ערד אונטער זיי. איך האב געליינט אסאך דערוועגן אין פארשידענע בלאגס, איך האב געקוקט אסאך קליפס פון 9/11, און איך בין געקומען צו די מסקנה אז די צווילינג טורעמעס זענען "נישט צוזאמגעפאלן" אזוויווי די אפציעלע רעגירונגס באריכט לויטעט, עס האט אויפגעריסן און איז צוגאנגען אין שטויב און אין רויעך. אין איין ווארט עס איז געווארן "אויס".
לאמיר דא אויסרעכענען אייניגע פאקטן ארום די אטאקעס אויף די ווארלד טרעיד סענטער אום 9/11:
• 8:46 אידנערפרי האט אמעריקן עירליינס פלייט נומבער 11 אריינגעקראכט אינעם צפון טורעם בערך ביים 93'סטען שטאק.
• 9:03 אינדערפרי האט יונייטעד עירליינס פלייט נומבער 175 אריינגעקראכט אינעם דרום טורעם בערך ביים 80'סטען שטאק.
• 9:50 איז דער דרום טורעם אראפגעקומען.
• 10:29 איז דער צפון טורעם (וואס איז ערשט אטאקירט געווארן) אראפגעקומען.
אין די אלגעמיינע גאס איז פארהאן בעיקר צוויי אנגעגענומענע ווערסיעס וואס דארפן אנגעבליך צו ערקלערן וויאזוי די טורעמעס זענען אומגעפאלן; 1) איז די אפיציעלע באריכט וואס די רעגירונגס 9/11 אויספארשונג קאמסיע האט פארעפענטליכט, לויט זיי זענען די געביידעס "צוזאמגעפאלן" אין רעזולטאט פון די פייער וואס דער ערעפלאן קראך האט פאראורזאכט, און לויט ווי זיי זענען מסביר האט דאס געארבעט בערך אזוי: די שטאקן אונטער ווי די פייער האט געברענט זענען אנגעהיצט געווארן אויף גאר א הויכען גראד וואס האט געברענגט דערצו אז די פאר שטאקן זאלן צוזאמפאלן אויף די שטאקן פון אונטער זיי, און יענע שטאקן האבן אונטערגעבראכן פון גרויס פרעשור אויף די שטאקן דערונטער אא"וו זענען אלע שטאקן געפאלן איינס אויפן צווייטן אין א קייט רעאקציע, ענליך צו די דאמינאו שפיל. 2) איז די ברייט באקאנטע ווערסיע פון די "9/11 אינסייד דזשאב" קאנספירירער אז די רעגירונג האט אונטערגעשטלט באמבעס אין ביידע בנינים וואס האבן אויפגעריסן נאך די ערעפלאן קראכן און דאס האט אראפגעברענגט די בנינים. א דריטע - אבער נישט אזוי אויפגעכאפטע – ווערסיע איז פארהאן אז די טערארסטיטן זעלבסט האבן איינגעפלאנצט באמבעס אין די צווילינג טורעמעס.
אויף די אפיציעלע רעגירונגס ווערסיע איז דא געציילטע עקספערטן וואס באשטעטיגן עס און האלטן אז די קראפט פון די ערעפלאן קראכן צוזאמען מיט די גאר הייסע גראד היצן פון די פייערן האט משפיע געווען אז די בנינים זאלן צוביסלעכווייז אונטערברעכן און עווענטואל פירן צו א טאטאלן צוזאמענבראך. רוב ארכיטעקטער און סייענטיפיקער זענען אבער נישט מסכים דערצו, סיי אז די סטרוקטשער וואלט נישט צופאלן פון אזא קראך און סיי אז די היץ פון די ברענעדיגע ערעפלאן גאזאלין גרייכט נישט די נויטיגע מאס היץ צו צולאזן אייזן. זיי ברענגן אן א שיעור סטאטיסטיקס און באווייזן פון אנדערע ענליכע פעלער אז אזא סטרוקטטער וואלט נישט געברויכט צוזאמענפאלן טראץ וואס עס איז אזוי שטארק געשעדיגט געווארן פון אויבן.
פון די אלע מיינונגען און טעאריעס איז שווער מחליט צו זיין וועלכע אנצונעמען און וועלכע נישט. כמעט יעדע עקספערט וואס האט זיך געלאזט הערן זיין מיינונג איבער דעם נושא האט - חוץ פון זיין וויסענשאפט אין די פעלד וואס ער ספעציעלירט זיך - געוויס אויך א אגענדע וואס האט אים געטריבן צוקומען צו זיין ענדגילטיגע מסקנה. טייל זענען פארביסענע ראדיקאלע וואס האבן דוקא א אגענדע אפצופרעגן די רעגירונג ווייל מ'טאר זיך נישט לאזן פאלש פארפירן... טייל זענען דעמאקראטן וואס האלטן אז בוש האט געהאט א יד דערין צו קענען בארעכטיכן זיין גיין אין קריג מיט די מוסלעמענע וועלט, טייל זענען בטבע קאנספיראציע ליבהאבער און באלעקן זיך די פינגער ווען מ'קען שטיצן א קאנספיראציע, און מאידך גיסא פון די וואס שטיצן די רעגירונגס ווערסיע קענזיין אז זיי זענען פאטריאטיש געשטימט און וועלן זיך לאזן פאפן אבי צו שטיצן די אפיציעלע רעגירונגס ווערסיע. דעריבער איז שווער ארויסצוקריכן מיט א באלאנסירטע מיינונג פון צווישן די עסקפערטן.
לאמיר אבער נישט קוקן אויף די אלע פאקטן און טעאריעס, לאמיר יא גלייבן אז דא איז פארגעקומען פארשידענע אויסנאמען און עס זענען צום ערשטן מאל פארגעקומען אומגעווענליכע ערשיינונגען וואס האט ציווישט אלע שטודיעס און פארשונגען פון די וויסנשאפטלער ביז יענעם סעפטעמבער דעם עלעווטן, לאמיר זאגן אז במציאות וואלטן די בנינים יא געקענט צוזאמפאלן בלויז פון די ערעפלאן קראכן און פון די נאכפאלגענדע פייערן, האט עס אבער ווירקליך פאסירט? איז עס טאקע צוזאמגעפאלן? קלאר אז נישט! טוה מיר א טובה און קוק גוט די ווידיאו קליפס און זאג מיר וואס דו זעהסט, א בילדונג וואס צופאלט אדער א בילדונג וואס רייסט אויף און צוגייט אין שטויב.
נאך וואס די ערעפלאנען האבן אטאקירט די בנינים האבן פייערן געברענט אין די ארומיגע שטאקן פונעם קראך פאר א וויילע, די צפון טורעם וואס איז ערשט אטאקירט געווארן האט געברענט קרוב צו 2 שעה, און די דרום טורעם האט געברענט א קנאפע שעה ביזן אומפאלן. די פייערן זענען נישט צופיל שטערקער געווארן דורכאויס די צייט וואס זיי האבן געברענט אין די געביידעס אזויווי מ'זעהט אין די ווידיאו קליפס, עס האט מייסטענס געברענט אויף ארויף און נישט אויף אראפ און עס האט ליבערשט אויסגעקוקט ווי עס גייט אויסברענען מיט די צייט ווי איידער מער אויפפלאמען. קיינער אין די וועלט האט זיך נישט געראכטן עס דאס וועט עווענטואל פירן צו א צוזאמענפאל.
בשעת די טורעמעס זענען געפאלן זעהט מען א אנדערע סארט רויעך און שטויב ווי וואס מ'האט געזען בשעת'ן ברענען. מ'זעהט ריזיגע וואלקענעס רויעך וועלכע פארומען זיך אויס איינס נאכן צייטן און ביז געציילטע סעקונדעס איז נישט געבליבן קיין זכר פונעם בנין. אויך הערט מען קלאר אויף די ווידיאו קליפס אויפרייסן איינס נאכענאנד בשעת די טורעמעס זענען געפאלן. די וואלקענעס רויעך און שטויב האבן זיך פארשפרייטע גאר ווייט. די ארומיגע גאסן זענען באדעקט געווארן מיט שיכטן שטויב פון עטליכע אינטשעס הויעך. די וואס האבן געארבעט אויפצורייניגן די ברוכווארג און אזוי אויך טייל איינוואוינער וועלכע האבן געוואוינט אין די ארומיגע געיגענט ליידן נאך היינט פארשידענע געזונטהייט פראבלעמען פון אריינאטעמען די שטויב/רויעך. די אויפרייניגער האבן אין פאקט נישט געטראפן אזויפיל טאן ברוכווארג פון וויפיל ביידע בנינים אינאיינעם זענען באשטאנען, פיל ווייניגער דערפון.
יעצט וויאזוי ווערן די אלע א"ד פאקטן ערקלערט אויב עס איז איינפאך צוזאמגעפאלן? ווען א בילדונג צופאלט קומט דאס מיט אזאלכע אויפרייסן און וואלקענס רויעך? וואס איז די שטויב מיט וואס אלע גאסן ארום זענען באדעקט געווארן? פארוואס האט מען נישט געטראפן די גאנצע מאס בוכווארג פון די "צופאלענע" בנינים? פארוואס האט מען נישט געטראפן צווישן די ברוכווארג עפעס שריים פון די אפיס פורניטשער אד"ג, ווי איז אלעס נעלם געווארן? פארוואס ליידן אזויפיל מענטשן געזונטהייט פראבלעמען אין רעזולטאט פון דעם וואס די צווילינג טורעמעס זענען איינפאך "צוזאמגעפאלן"?
אלא מאי? וועט מען מוזן אננעמען ווערסיע 2) אז די רעגירונג האט איינגעפלאנצט באמבעס אין די בנינים? ניין! מיין געוויסן לאזט מיר דאס נישט גלייבן! איך קען נישט משלים מיטן מציאות אז כ'וואוין אין א לאנד וואס די רעגירונג האט אזוי פארראטן אירע בירגער. און איך האלט נישט יעצט ביים זיך אויפהייבן און מופן קיין מאראקא דעריבער איז מיר באקוועמער נישט צו גלייבן די ווערסיע (עכ"פ אזוי לאנג ווי וויקיליעקס באשטעטיגט עס נישט...), און איך האלט אז אסאך אנדערע וואס טראגן זיך ארום מיט דעם קאנספיראציע האלטן אויך נישט אזוי טיף אין הארץ.
וועט מען ע"כ מוזן אננעמען אז עס איז יא געווען די טעראריסטן וועלכע האבן פון פאראויס איינגעפלאנצט באמבעס אין די בנינים און דאס האט בייגעשטייערט די אויפרייסן וועלכע האבן פארוואנדלט דאס מערהייט פון די טורעמעס און איר אינהאלט צו שטויב. בלייבט אבער נאך אלץ עטליכע שוואך פארענטפערטע קשיות, 1) וואס גייט אן די רעגירונג צו שטיצן אזא סארט טעאריע? ווייל ס'איז א בושה אז די סעקיורעטי פון די ווארלד טרעיד סענטער איז דורכגעפאלן מיטן פארזעהן וואס די טעראריסטן האבן געטוהן אונטער איר רוקן? און די גאנצע 9/11 איז דען נישט קיין דורכפאל פאר די אמעריקאנע זיכערהייט סיסטעם? זאל שוין דאס מיטגיין... 2) פארוואס האבן די טעראריסטן געברויכט היידזשעקן פליגערס אריינצוקראכן אין די צווילינג טורעמעס אויב האבן זיי איינגעפלאצט דערין באמבעס עס אויפצורייסן? בלויז צו פארגרעסערן די סימבאלישקייט פון די אטאקעס? דוחק.
נ.ב. איך האב דירעקט נישט בארירט די טעמע פון "ווארלד טרעיד סענטער בילדונג 7" צוליב וואס דאס איז די מהלך וואס די "9/11 אינסייד דזשאב" גרופע נוצט פאר איינע פון די שטערקסטע באווייזן איבערצוצייגן די ווארהייט פון זייער קאנספיראציע און איך גלייך נישט זיך צו אינדענטיפעצירן מיט זיי.