וויצן, ווערטלאך, אנקעדאטן און מעשה'לאך איבער חזנים און חזנות
פון "די געשיכטע פון חזנות":
- אטעטשמענטס
-
-
ממש נישט לאנג צוריק איז נפטר געווארן הרה"ח ר' פתחי' לאם ז"ל, פון דער באקאנטער לאמ'ס בוטשער סטאר אין וויליאמסבורג. ר' פתחי' איז שוין פון זיינע יונגע יארן געווען באשאנקען מיט גאר א שטארקע און זיסע שטימע. זייענדיג א יונגער בחור, עלנד אליין אין ישיבה, האט ער פשוט און פראסט נישט געהאט וואו צו גיין פראווען א יו"ט. וואס טוט מען? פתחי' גיבט זיך אן עצה. ער האט זיך פארדינגען פאר א שוהל אלס חזן, און אנשטאט דעם האט אים די דארטיגע קהילה באצאלט מיטן צושטעלן אן אכסניא און די סעודות יו"ט.
האט טאקע אמאל פאסירט איין ערב ר"ה, פתחי' נעמט די באן צו פארן ערגעצוואו אויף אזא סארט חזנות אויסטויש פאזיציע, פתחי' איז געווען מיד פון די פארצווייגטע לימודים אין ישיבה, און איז טיף אנטשלאפן געווארן אויף די באן. אזוי אז ער האט זיך אויפגעכאפט הארט פארן זמן, שוין האבענדיג פארפאסט אראפצוגיין ביי זיין דעסטינאציע, וואו דער צוג איז שוין דורכגעפארן אריבער צוויי שעה צוריק. וואס דאס באדייט גלייכצייטיג אז אויב ער בלייבט אויפן קומענדיגן אפשטעל, וועט ער מוזן וויילן ר"ה אויפן באן, ווייל עס איז שוין גאר נאנט צום זמן.
די שווערע סיטואציע האט געברענגט דעם יונגען ישיבה בחור שטארק אנצוהייבן וויינען. דער קאנדאקטער פונעם באן האט דערהערט זיינע געוויינען, און נאכן הערן דעם אורזאך דערפון האט ער אים באמת געוואלט העלפן, ער האט אבער אויף קיין פאל נישט געקענט אפשטעלן די באן אינמיטן וועג ווען מען פארט נישט דורך קיין סטאנציעס. ער האט אבער געזאגט פאר פתחיה'ן, אז ווען דער באן וועט פארן פאמעליך אויפן וועג ארויף א בארג, דאן קען ער אראפשפרינגען.
פתחי' האט אנגענומען זיין עצה און איז טאקע אראפגעשפרינגען פונעם באן, און מיט די הילף פון א לאקאלן פאסט טרעגער וואס האט אים געגעבן אנווייזונגען, האט ער באוויזן אנצוקומען צום נעטסטן אידישן קווארטל.
ווי נאר ר' פתחי' האט אריינשפאצירט אינעם אידישן קווארטל, זענען די דארטיגע דארפישע אידן ארויפגעפאלן אויף אים, און אים ארומגענומען און צוזאמגעקישט. הערענדיג אז ער איז גאר א חזן, האבן זיי כולם פה אחד מודה געווען אז ער איז נישט קיין אנדערער ווי אליהו הנביא אליין וואס מען האט געשיקט פון הימל יעצט ממש קורץ נאכדעם וואס זייער חזן איז נפטר געווארן פאר יו"ט. ווי אויך האבן זיי אים געזאגט אז בלויז א מנין אידן וואוינען אין דעם שטעטל, און יעצט אז דער חזן איז נפטר געווארן איז מען געבליבן מיט בלויז ניין, אבער מיט אים פתחי'\אליהו הנביא, האבן זיי סיי א חזן און סיי א צענטער צו מנין.
פתחי' האט זיי אבער געזאגט אז ער איז א פשוטער איד, און די השגחה פרטית האט געפירט אז ער זאל פארשלאפן זיין סטאנציע, און אזוי ארום אנקומען אהער אין די פאסיגע צייט צו זיי אויף ר"ה.
ר' פתחי' פלעגט שפעטער זאגן: מיר הערן כסדר מעשיות פון צדיקים וועלכע האבן זוכה געווען צו גילוי אליהו. איך בין אמאל געווען אליהו הנביא אליין!
