איך בין היינט געווען מנחם אבל זיין ביי ספינקא רבי הרה"צ ר' בעריש שליט"א, וועלכער זיצט שבעה ל"ע נאך זיין רעבעצין ע"ה, ביי זיך אין בית המדרש (ווי גוט האט ער זיך אויסגעדרוקט ביי די לויה: די בית המדרש איז געווען איר דיינונג רום, דערפאר מאכט מען דארט די לויה און מען זיצט דארט שבעה). הגם דער רבי שליט"א איז נישט געווען אין ביהמ"ד ווען איך בין אנגעקומען צוליב זיין חולשה ל"ע, האב איך אבער מנחם געווען די קינדער זיינע, און די ברידער פון די נפטרת ע"ה להבחל"ח הרבנים שליט"א.
עס איז געווען א הארצרייסנדע סצענע צו זעהן יונגעלייטלעך אויסגע'שורה'ט אויף די שווארצע מתעסקים בענקלעך (די מתעסקים חברה וועלן זיכער באקומען א שטוהל אין גן עדן, זיי שטעלן אהער א מעכטיגע אפאראט ביי יעדע ניחום אבלים ל"ע, פון עירקאנדישן מיט סטיעם ביז קאלטע וואסער און באקוועמע בענקלעך, א זאך וואס פלעגט אמאל קאסטן שווערע געלטער געבן זיי אוועק לשם מצוה, תהא משכורתם שלימה, און קיינער זאל צו זיי נישט דארפן צוקומען), ברודערלעך וואס האבן יעצט פארלוירן א מאמע, אזוי פלוצלינג אזוי אומגעראכטן, בעת זיי זענען עוסק די לעצטע האלב יאר מיט תהלים זאגן פארן געזונט פון זייער פאטער, איז די ביטערע גזירה גאר געווען אויף די מוטער ע"ה. איך האב שוין לאנג נישט געזען אזעלכע פארוויינטע אייגעלעך ווי דארטן, עלטערע אינגעלייט וועלכע מאכן שוין באלד חתונה קינדער זענען געזיצן נעבן זייערע אינגערע ברודער, איינער פון זיי א אינגער חתן, אלע האבן זיי נעבעך געהאט אזעלכע אויפגעשוואלענע אויגן פון פול געוויין. זאל השי"ת זיי מנחם זיין, צוזאמען מיט ציון וירושלים, מיטן אנקום פון משיח צדקינו בב"א.
היינט איז נפטר געווארן א חשוב'ער איד ר' בערל גאטעסמאן, אין אינגן עלטער פון 43 יאר בערך.
ר' בערל פלעגט ארבייטן - איך שרייב ארבייטן, אבער דאס איז אזא סארט ארבעט וואס מען קען נישט באצאלן, עס איז געווען מער לשם מצות ביקור חולים - אין "אשל אברהם" היים אין וויליאמסבורג, וואו ער פלעגט זיך ארומדרייען און מחזק זיין די עלטערע אידן, זיי ארויסהעלפן מיט אלע זייערע באדערפענישן, און פרובירן לייכטער צו מאכן זייער מצב מיט אלעס וואס נאר מעגליך.
די שמייכל פון ר' בערל, באגלייט מיט זיין גוט ווארט, וועלן מיר געדענקן אויף לאנגע צייטן. יהא זכרו ברוך, און די זכות פון מצות ביקור חולים זאל אים ביישטיין שתהא נשמתו צרורה בצרור החיים, ובלע ה' מות לנצח ומחה ה"א דמעה מעל כל פנים בב"א.
יעצט קומט די ביטערע בשורה אז דער תלמיד חכם און מגיד שיעור הרה"ח ר' מענדל הענדלער ע"ה פון קרית יואל האט ליידער אויסגעהויכט זיין נשמה אינמיטן רעוא דרעוין אין ביהמ"ד קומץ המנחה.