שרייבעריי פארמעסט ווינטער תשפ"א - איינלייטונג
[align=center]
[/align]
[/align]
חברה! דער עולם איז גרייט???
כ'הער נישט!! וואאאאס??? נאך העכער...!!!
אט אזוי.
אצינד טייערע מיטרייזנדע, באפעסטיגן די סיט-בעלטס, זיך אנכאפן אינעם בענקל, אונזער שאטל גרייט זיך אט אט צו לאנדן אינעם אטמאספער פון די 'אידישע וועלט'.
מיר דירעקטירן אונזער שאטל גראד צו די טויערן פון די היימישע קרעטשמע וואו מען קען ווען אימער אריינפאלן פאר א גלעזעלע שנאפס און א גוט ווארט.
אה, אט דא זענען מיר, קומטס מיך נאך, לאמיר אבזערווירן אביסל דעם מצב דא.
געשפאנט. איבערגענומען. פארגאפט. באגייסטערט. אנגעדרייט.
די עקסטאז שפירט זיך אין די לופט, אונזער באשיידענע וועלטל איז ארומגענומען מיט א שטורמישע לעבהאפט.
א שטילע ווינטל וואס זאגט אן א מאכטפולער שטורעם בוזשעוועט און ברענגט מיט זיך א שניידנדער אויפגעהייטערטער אטמאספער, פון אלע פענסטערס זעען זיך דורך קעפ, מיט נעזער צוגעקלעפט צום גלאז פונעם פענסטער, שענקענדיג פאר די דורכגייער א קאמישע סצענע ווען אויף יעדן פענסטער זעט מען א פארהויכטן וואלקן און אין צענטער א פלאטשיגן נעזל.
יעדער ווארט אז דער שטורעם זאל אנקומען, די אויגן אין די מיילער זענען ברייט צועפנט בשעת ווען מען האלט קוים איין דעם אטעם, די נייעס אגענטורן האלטן געשפאנט מיט פרישע שפעקולאציעס און אנאליזן יעדע פאר מינוט, און אין די לופט שפירט זיך קלאר אז אין יעדע ליאדע מינוט איז אומשטאנד אויסצוברעכן דער שטורעם.
מיטאמאל הערט מען א רודעריי, קודם א שטילע, דערנאך ווערט עס העכער, און נאך העכער, ביז מען קען שוין קלאר אנדייטן אז דאס זענען קולות פון הילכיגע אפלאדירונגען, אפווארטנדיג דעם איבערראשונג וואס האט זיך ענדליך באוויזן.
בשם די עסקנים בעהט מען זייער אז יעדער זאל זיך האלטן צו די פארארדענונגען פון די אינסטאנצן און נישט גורם זיין קיין עגמת נפש!
בחורים ארויף אויף די פארענטשעס! אברכים אינדערמיט, עלטערע אידן אויף די בענק פון פארנט!!! יעדער פאטשט!!!
מוזיק! אנהייבן מיטן אינטרא!!!
טארא-טאראאאםםם...!!! ראטאראטאטאאאםם!!!
ת'הא ש'נת א'ייוועלט פ'ארמעסטן!!!!
דער אייוועלט שרייבעריי פארמעסט פון ווינטער תשפ"א איז דא!!!
אצינד געבן מיר איבער דאס ווארט פארן יושב ראש זז"ג וועלכער וועט עפענען דעם מעמד;
טייערע חברים און ידידים.
פותחין בכבוד האכסניה, ברוך השם אז מיר האבן די זכיה צו געהערן צו אזא הייליגע געמיינדע פון אידן וועלכע האבן אויסגעקליבן צו שעפן זייער חיות דא אינעם היימישן געוועלבל, און נישט ארויסגיין פאשען בשדות אחרים, זאל דער אויבערשטער טאקע באצאלן שכרם הטוב פאר די אלע וואס זענען עומד על המשמר צו האלטן געשמאק די לופט דא בגשמיות וברוחניות.
אקעי אקעי, שרייט נישט אזוי איך קום צום ווארט, פאוואליע פאוואליע….
תכלית גערעדט.
א פרישער גייסט שוועבט לעצטנס דא אין אונזער וועלטל, די בענקלעך אין קרעטשמע זענען אפגעשטויבט געווארן, טישן און בענקלעך וועלכע זענען געלעגן צאמגעלייגט אין די קרעטשמע קאמערן זענען צוריק ארויסגעברענגט געווארן פאר די נייע באזוכער און אקטיווע סארווירער, אלטע וויינען ווערן כסדר ארויסגעשלעפט פון די טיפע קעלערן, און איבער אלעם דער נייער אויסוואל פון משקאות וואס דא טוציך אפ…
דאס קען יעדער אייוועלט באזוכער זאגן מיט א פולן מויל, אז אין די לעצטע צייט ווערט אלץ ברייטער און ברייטער דער אויסוואל, און פון אלע זייטן יאווען זיך פרישע שעפערישע שרייבערס, תוכנ'דיגע און געשמאקע. א פלוס פון ידיעות, הומאר, טאלאנט, און נאך, פארפלייצט אונזער וועלטל, מיטשלעפנדיג אלע אירע איינוואוינערס מיטן שטראם, און אהערשטעלנדיג א מים שאין להם סוף אויפן געוועב על טהרת הקודש.
תלי"ת, דעם פארגאנגענעם זומער שנת תש"פ איז אפגעהאלטן געווארן א פארמעסט צווישן די אייוועלט שפאלטנס, אין וועלכע מערערע שרייבער האבן אנטייל גענומען, און אהערגעשטעלט סחורה פונעם העכסטן קאליבער. דער פארמעסט האט גאר גוט אויסגענומען ביים היימישן ציבור דא, און די פארלאנגען אויף א פרישער פארמעסט האבן נישט אויפגעהערט צו פליסן.
דעריבער טוען מיר דא אפיציעל באגריסן און אויפנעמען דעם נייעם פארמעסט וואס ווערט אט יעצט געלאזט אין גאנג, דער גרויסארטיגער שרייבעריי פארמעסט פון ווינטער תשפ"א וואס אנטשפרעכט איבערצושטייגן אלע פראיעקטן און פארמעסטן פון ביז אהער, און וועט האפנטליך פארזעצן דעם וועג ארויף אויף וועלכע מיר זענען אצינד געריכטעט.
אצינד טייערע אייוועלטער איינוואוינער!! נעמט אויף מיט עהרע אונזער נייעם פארמעסט!!!!
קלאטשט! קלאטשט!!! שטערקער!!! די הענט זאל זיך צו ברעכן די פוס זאל זיך צולאזן אבער געבט נישט אויף!
אה אה... דאס הייסט געקלאטשט… די הענט ווערן שוין פון רויט צו פורפל און מען גיבט נישט אויף!!!
[ס'צולאזט זיך אין א העפטיגע קלאטשעריי, שאלנדיג דערביי פילע פאטריאטישע לאוזנגען ווי 'קיפ אייוועלט גרעיט' און נאך.]
אצינד העמיר צוגיין צום סדר פונעם פארמעסט, און צו דעם וועלן מיר ארויפרופן דעם אינציאטאר פונעם פארמעסט, דער אויסגערופענער קלאצקאפ ירום הודו, ער זאל ארויפקומען אויפן סטעידזש און איבערגעבן די טעכנישע איינצלהייטן פונעם פארמעסט.
מען בעהט יעדער זאל בלייבן זיצן אויף די פלעצער די גאנצע צייט.
שאאא… שששאאאא….שטיל זאל זיין!!!!
נישט שושקען, עס מאכט נאר שווערער צו הערן!!!
קלאצקאפ! גאו אהעד!
