מסע המרומם "אהבת איתן" דורך כ"ק אדמו"ר מבאבוב 45 צו פולין גאליציע אלול פ"ג
יעדע מינוט פון די היסטארישע נסיעה איז געווען דורכגענומען מיט אזויפיל התעוררות און התרוממות און יעדע סטאנציע וואו מען האט געוויילט איז געווען איינגעטינקען אין גלענצענדע פרעכטיקייט.
מיט איינפאכע ווערטער איז שווער אויסצודריקן טיפע געפילן פון הארץ. די ווייטערידעג בילדער קענען טיילווייז אפמאלן די דרויסענדיגע התעוררות און שיינקייט וואס האט באגלייט די מיטפארער דורכאויס די גאנצע רייזע. אין די ווייטערדיגע שורות וועלן מיר פרובירן איבערצוגעבן אין קורצן 'דברים כהווייתן'.
כ"ק מרן רבינו שליט"א איז אפגעפארן מיט א קבוצה פון העכער הונדערט נדיבים וחסידים וואס זייער מסירות נפש'דיגן בייטראג פאר בנין ביהמ"ד האט זיי געגעבן די זכות צו זיין פונ'ם רבי'נס נאנטע סוויטע און מיטלעבן צוויי מעת לעת פון פולשטענדיגע תענוג רוחני במחיצת הקודש.
ג' אלול, זונטאג אווענט, האט זיך אין א מזל'דיגע שעה געהויבן די פליגער פון רבינו שליט"א אויף וועלכע ס'זענען מיטגעפארן א שיינעם טייל פון די משתתפי הנסיעה. מאנטאג פארמיטאג, אום עלף אזייגער, איז מען אנגעקומען קיין רישא, וואו רבינו שליט"א האט זיך געשטעלט דאווענען אינאיינעם מיט'ן ציבור, אין א ספעציעל אפגעזונדערטן זאַל אין לופטפעלד.
ליזענסק
די משתתפי הנסיעה וועלכע זענען אנגעקומען גרופענווייז אין עטליכע פוילישע לופטפעלדער, זענען אלע אנטפאנגען געווארן אין לופטפעלד מיט פאסיגע כבוד און צוגעפירט געווארן מיט באקוועמע טראנספארטאציע קיין ליזענסק וואו זיי האבן געהאט א געלעגנהייט זיך איבערצופרישן פון די לאנגע רייזע, גיין אין מקוה און זיך אראפלייגן אין פריוואטע צימערן וואס זענען געווען שיין צוגעשטעלט. א ברייטע מיטאג איז געווען אנגעגרייט להשביע נפש כל חי מכל מיני מעדנים ומטעמים.
איידער'ן ארויפגיין צום ציון הק' פון הייליגן רבי ר' אלימלך זי"ע האט רבינו שליט"א משמיע געווען דברי הכנה דרבה און דערנאך האבן אלע אינאיינעם געזאגט, מיט שטורעמישע התעוררות, דעם תפלה קודם התפלה פון הרה"ק ר' אלימלך זי"ע.
דאן האט מען משלים געווען קריאת התורה פון שחרית און רבינו שליט"א האט גומל געבענטשט. אונטערוועגנס צום ציון האט רבינו שליט"א זיך אפגעשטעלט ביים כהנים שטיבל און אפגענומען קוויטלעך פון די כהנים העומדים בעזרה און פון דארט איז דער רבי שליט"א אריין אין אהל הקדוש.
דאס התעוררות ביים זאגן די ח"י פרקי תהלים איז געווען אין לשער און די תפלות האבן זיך געריסן עד לב השמים. נאכ'ן תהלים זאגן האט רבינו שליט"א מרעיש עולמות געווען להיפקד בישועה ורחמים למען הכלל והפרט.
זייענדיג אין אזא הייליגע השראה פון התעוררות רחמים האט רבינו שליט"א מכבד געווען צו זינגען 'מרן די בשמיא' און זיך דערנאך משתטח געווען אויפ'ן קבר אין משך פון א לענגערע צייט.
דאן זענען די משתתפים אריבער איינציגווייז לפני הקודש איבערצוגעבן קוויטלעך. אין לויף פון עטליכע שעה איז רבינו שליט"א געזעסן ביים ציון הק' און בדביקות עילאה געליינט קוויטלעך בפרטיות.
פארלאזנדיג דעם אהל הק' איז רבינו שליט"א פארבעטן געווארן דורך הרה"ג ר' דניאל רוקח שליט"א האדמו"ר מליזענסק צו קומען אנקלאפן א מזוזה אין דעם נייעם בנין הכנסת אורחים אין ליזענסק, וועלכע איז לעצטענס אויפגעשטעלט געווארן אויפ'ן ארט ווי ס'איז אמאל געשטאנען דאס הויף פון צדיקי בית ליזענסק לדורותיהם.
viewtopic.php?t=63021