ציטיר
20
צו לייגן א דאנק דארפט איר זיין אריינגעלאגט
תגובה
דורך טפסר
» דינסטאג יוני 25, 2024 7:54 pm
וואלן אין ענגלאנד - איבערזוכט. בריטאניע, זינט איר עמפעריע צוזאמלייג, זיצט זיך רעלאטיוו שטיל און רואיג און טרינקט זיך אירע טיי אונטער אירע פארוואלקענטע הימלען שטייענדיג קיינעם אין וועג. אבער דאס בריטישע פאלק איז נישט פראבלעמען פריי. אירע גרעניצן זענען פארפלייצט מיט אומלאגאלע אימיגראנטן וועלכע רייטן אויף איר אומפעאיגקייט צו זאגן ניין, אירע נאציאנאלע געזונט דינסט איז פארזינקען אין א קריזיס זינט זי איז איבערגעשטרענגט געווארן פון קאוויד, אירע בירגער זענען פויל און די פרייזן זענען הויך. אין איין ווארט - דער מאסן איז אומצופרידן און אומגעדולדיג און גרייט פאר א טויש. די לעצטע פערצן יאר האבן די קאנסערוואטיוון רעגירט מיט א מיאריטעט אינעם פארלאמענט און האבן גאנץ ווייניג געטוהן צו נידערן אימיגראציע, הייבן דער עקאנאמיע און שניידן שטייערן. אין יעדער געביט איז דער מצב בלויז פארערגעט געווארן אונטער זייער זייגער. די ארבעט פארטיי, זייער קעגענער, גערופן "לעיבער" האט ערליך געדינט אינעם אפאזיציע פון וואו זיי האבן זיך געשלאגן און קעגן געשטעלט קעגן די געזעצן און לעגיסלאציעס וועלכע די קאנסערוואטיוון האבן געוואלט דורכפירן, ביז דער אמטירנדע פריים מיניסטאר האט באשלאסן צו פארופן וואלן. די יעצטיגע וואלן אין בריטאניע זענען פון די לאנגווייליגסטע וואלן אינעם לעצטן יאר-הונדערט, די וואלן רעזולטאטן זענען קלאר ווי דער זון אינמיטן העלן טאג, נעמליך די קאנסערוואטיוון האבן פארלוירן זייערע כח און פאפולאריטעט אזש געוויסע שאצן א פולקאמע סתימת הגולל אויף דעם-באלד-צוויי-הונדערט-יאר-אלטיגע פארטיי צו וועלכע פולע וועלט באקאנטע פיגורן האבן באלאנגט, א שטייגער ווי ווינסטאן טשירטשיל און לויט די לעצטיגע אנקעטעס וועט לעיבאר אליינס געווינען א שיינער מערהייט אין דעם הויז פון קאמאנס און דערמיט ערווארטעט דאס בריטישע פאלק א באקוועמע לעיבאר רעגירונג פאר די קומענדיגע פונף יאר. איז אבער פארט דא איין קיינטש דא, די בריטישע זענען נישט העכסט צופרידן, נישט פון לעיבאר און זיכער נישט פון די קאנסערוואטיוון, פאר די מאסן קענסטו איינרעדן אז לעיבאר גייט קומען ברענגען א טויש און אויסלייזן דאס פאלק פון אלע זייערע פראבלעמען אבער ארייקוקענדיג טיפער אין זייערע געדאנקענגאנג און פלענער, ווייזט זיך אויס א קנאפע דיפערענס צווישן לעיבאר און זייערע קעגענער. דעריבער האט זיך אויפגעוועקט אן אלטע פאליטיקאנט מיטן נאמען ניידזשל פאראדזש און עטוואס צעשאקלט דעם שטאנג. שטייענדיג אין שפיץ פונעם רעפארם פארטיי - א פארטיי אינעם רעכטן זייט פונעם געזעלשאפט, גענוג רעכט אז די לינקע באציען זיך צו זיי אלס עקסטרעם, רופט ער פאר א טויש. ער וויל גענצליך אפהאקן נעט מיגראציע און צוריק אריין ברענגען דאס פאלק צום ארבעט דורך צוימען פארגוטיגונגס געלטער און מילדערן שטייערן. זיין פאפולאריטעט האלט אין איין שטייגן און קיינער קען נאך נישט קלאר פארויסשאצן וויפיל שטימען ער וועט זאמלען און פון וועלכע פארטיי ער וועט זיי צונעמען. ער אליין פארשטייט אויך אז ער וועט נישט קענען כאפן מער ווי געציילטע זיצן אינעם הויז אבער פון זיין זייט איז יעדער שטימע א געווינס און עס איז איהם גענוג אז די קומענדיגע פונף יאר וועט ער לפחות האבן א שטימע פון אפאזיציע אינעם לעיבאר-רעגירנדע פארלאמענט. פאראזש איז נישט קיין קליינע אינגל, ער איז אין פאקט פון די וואס האבן אנגעפירט מיטן גאנצן ברעקזיט קאמפיין מיט 8 יאר צוריק וועלכע האט געווינען קעגן יעדער פארויסשאצונג. ווי אזוי זאכן גייען זיך ווירקליך אויסשפילן ווייסט נאר דער אויבישטער, עס איז קלאר אז לעיבאר וועט איבערנעמען די רעגירונג און לויט ווי זאכן קוקן אויס וועט זי נישט ברענגען קיין דראסטישע ענדערונגען אינעם געזעלשאפט, לאזענדיג זאכן רעלאטיוו אזוי ווי זיי זענען ביז יעצט, דאס מיינט אז דאס בריטישע פאלק וועט זיך נאך מוזן ספראווען מיט א מערהייט פון זייערע פראבלעמען פאר כאטש א וויילע. וואס איז אבער יא אינטערעסאנט נאכצוקוקן איז ווי פול כח פאראדזש וועט זיך צוזאמנעמען די קומענדיגע פאר יאר און צו עס וועט איהם ווירקליך געלונגען איבערצושטייגן די קאנסערוואטיוון און גאר ווערן דער שטימע פון דער רעכטע לאגע אין בריטאניע.
