ויפתח את פי האסון... (פרעזידענטליכע דעבאטע June 2024)
די מעכטיגע פרעזידענט פון די פאראייניגטע שטאטן האט געקעקעצט אביסל, ער איז געווען הייזעריג און אביסל פארשלאפן.
ווי האט די עולם מיטגאהאלטן דאס? ער האט פונקט דעמאלטס געהאט א אפענע דעבאטע מיט א רויטער קרימינאל, אן אנגעקלאגטער פארשוין וואס האט אין א שוואכע מינוט באוויזן צו אינוואדירן די ווייסע הויז פאר א צייט אפשניט פון 4 שנות זעם.
די אמעריקאנער פאלק האט גלייך נאך די 4 שנות הרעב פארשטאנען וואספארא טעות זיי זענען באגאנגען און צוריק אריינגעוועלט א נארמאלע באזעסענער פרעזידענט וואס זאל פירן דאס לאנד על מי מנוחות.
דא עקא, די 4 שנות שובע דערנענטערן זיך צו א ספק ענדע, מ'ברויך אויסוועלן נאכאמאל א פירער, און מנהג המקום איז צו אפהאלטן די טראדיציאנאלע דעבאטע צווישן די צוויי פרעזידענט קאנדידאטן, און דאס האבן מיר מיטגעהאלטן די פארגאנגענע דאנערשטאג נאכט.
פרעזידענט ביידן האט אפגעהאלטן א דעבאטע מיט די פריערדיגע פרעזידענט טראמפ.
ווי נאר די ערשטע ווארט האט זיך ארויסגעלאזט פון ביידנ'ס מויל, האבן זיך די רעפאבליקאנער זיך גענומען הוליען און טאנצן!
יעי!!! ביידן איז הייזעריג!!!
יעי!!!!! ביידן האט געקעקעצט פאר א גאנצע 15 סעקונדעס!!!
יעי!!!!!!!!!! ביידן רעדט צו שנעל און אומקלאר.....
און צו די גרויסע כלימה האבן זיך די דעמאקראטישע פארטיי מיטגעכאפט און בקולות נהי ובכי האבן זיי אנגעהויבן צו טענה'ן אז עס איז העכסט צייט צו אויסוועלן א פרישע קאנדידאט.
און איך שטיי און שטוין מיט וואונדער, דאס איז עס? דאס איז א פרעזידענט? א גוטער בעל דרשן ותו לא?!
דאס ווערט פארלאנגט פון א פרעזידענט? צו קענען פליקן און דעליווערן שיינע דרשות?
יארן עקספיריענס איז גאר א חסרון? ביידנ'ס רייכע יארן זקן בא בימים ער איז געווען די יונגסטע פאליטיקאנט אין די אמעריקאנער היסטאריע - דאס אלעס זענען די דעמאקראטן גרייט אוועק ווארפן בעבור בצע עטליכע געשליפענע ווערטער?!
א בעל דרשן מגיד מישרים ברויכן די אמעריקאנער בירגער??
אמעריקע דארף א פרעזידענט! אן עקספיריענסד מאן וואס פארשטייט א פרק צווי אין הלכות הנהגת מדינה.
אמעריקע דארף נישט קיין רויטע קיוט בדחן וואס האט אביסל מער ענערדזשי פון די יעצטיגע פרעזידענט וואס איז פארנומען די טעג מיט פארשידענע מלחמות און אפעראציעס איבערן וועלט.
דער רויטער בר פלוגתא איז אנגעקומען פריש און אנגעפאשעט נאכן שפילן צענדליגער גאלף געימס און די פאלק פאלט פאר אים! אוי לאותה בושה אז צו זיין א פרעזידענט אין די פאראייניגטע שטאטן דארף מען קענען שפילן גאלף און מאכן גוטע פאקסן און וויצן אויף די טעלעוויזיע דעבאַטע.
מיין טרוניה איז נישט אויף די טראמפיסטישע מאג''איסטן, מיין טענה איז אויף די רעציאנאלע דעמאקראטן וואס זענען יעצט גרייט אויפצוטוישן זייער געלונגענע לאנג יעריגער עקספיריענסד פרעזידענט מיט עפעס א רויטער תבנית שור אוכל עשב...
די פיוטשער פון אמעריקע ווענדט זיך יעצט אין א 90 מינוטיגע טעלעוויזיע שוי?! אר יו סיריעס?!
זייט ווען דארף א פרעזידענט רעדן הויך און קלאר? זיין מח ארבעט עפעס שוואכער ווייל ער האט געכאפט א פארקילאכץ?
אמעריקע גייט פארלירן מלחמות צוליב דעם וואס זייער פרעזידענט איז שוין נישט אין די יארן וואס מ'שפילט גאלף?
דאס איז עס
דיר רויטער אתון האט געעפנט דאס מויל, ער האט באוויזן צו דערשטיקן די יעצטיגע פרעזידענט און די וואס גלייכן די אמרי פי האתון זיי זאלן זיך שפעטער ספראווען מיט די אסון וואס וועט באטרעפן אמעריקע.