עלעקשאן טאג איז אט אט דא און בשעת די מערסט נאכגעפאלגטע פארמעסט איז פארשטייט זיך די פרעזידענט פארמעסט צווישן געוועזענע פרעזידענט טראמפ און וויצע פרעזידענטקע העריס קומט אבער אויך פאר גאר וויכטיגע פארמעסטן פאר קאנגרעס און סענאט.
קאנגרעס איז מער פשוט ווען אלע 435 קאנגרעס מיטגלידער לויפן פאר ווידערוויילונג יעדע צוויי יאר.
סענאט לויפט אויף 6 יעריגע טוירמס ווען יעדע צוויי יאר לויפט א דריטל פון די הונדערט סענאטארן פאר ווידערוויילונג.
לאמיר א מינוט כאפן א בליק אויף די סענאט פארמעסטן און בקיצור דורכלויפן די פארמעסטן אויף וואס מ'האלט א אויג צו זעהן ווער עס גייט געווינען אז אפילו די וואס האבן נישט מיטגעהאלטן ביז יעצט זאלן האבן א שטיקל בליק מהנעשה והנשמע..
34 זיצן גייען זיין אויף די בעלאט, פון דעם זענען 33 געהעריגע פארמעסטן און איין זיץ אין נעברעסקע א ספעשיל עלעקשאן צו ענדיגן די טערמין פון געוועזענע סענעטאר בען סעס וואס האט פארלאזט די סענאט א יאר צוריק, די זיץ איז געווארן אנגעפילט פאר דערווייל דורך די געוועזענע גאווערנער פון די סטעיט פיט ריקעטס וואס לויפט יעצט צו ענדיגן די טערמין ביז 2026.
פון די 34 זיצן זענען רוב פארזיכערטע זיצן, דהיינו, אז עס איז אין א שטארק רויטע אדער בלויע סטעיט וואס איז נישט ערווארטעט אז די פארטי וואס האלט אן דעם זיץ זאל עס פארלירן, לאמיר נאר געבן א בליק אויף די ביסל זיצן וואס וועט זיין אינטערסאנט מיטצוהאלטן ווער ס'גייט עס געווינען.
נאך איין קליינע הקדמה, די דעמאקראטן האלטן יעצט קאנטראל אויף די סענאט מיט א 51-49 מערהייט, רעפאבליקאנער דארפן אויפפיקן צוויי זיצן צו געווינען קאנטראל אדער 1 זיץ אין פאל טראמפ געווינט און וויצע פרעזידענט ווענס די טיי ברעכנדע שטימע, און מיט וועסט ווירדזשיניע ערווארטעט צו פליפן ווי מ'וועט שוין אויסשמועסן, און נאך צוויי דעמאקראטישע זיצן אין שטארק רויטע סטעיטס בשעת וואס די רעפאבליקאנער האבן נישט עכט קיין זיצן צו פארטיידיגן אין עכט שמאלע סטעיטס, זענען די רעפאבליקאנער אין א גאר גוטע פאזיציע איבערצונעמען סענאט.
וועסט ווירדזשיניע
מ'וואלט עכט נישט געדארפט אפילו רעדן פון די שטארק רויטע וועסט ווירדזשיניע, אבער די זיץ ווערט יעצט געהאלטן דורך דעם דעמאקראטישע געווארענע אינדעפענדענט דזשאו מענטשן וועלכער לויפט נישט פאר ריעלעקשאן און די זיץ איז ערווארטעט צו פליפן צו די רעפאבליקאנער און מיט דעם וועט די סענאט שטיין ביי א 50/50.
די רעפאבליקאנער קאנדידאט איז דער גאר פאפולערער גאווערנער דזשים דזשאסטיס, די דעמאקראטישע קאנדידאט איז גלען עליעט.
די פארמעסט איז רעיטעט לויט אלע מבינים אלס סעיף רעפאבליקען.
מאנטענע
אינקאמבענט דעמאקראט דזשאן טעסטער לויפט פאר א פערטע טערמין אין די שטארק רויטע מאנטאנא אבער דאסמאל זעהט אים נישט אויס צו גיין אזוי גוט ווי די פאריגע דריי מאל, זיין רעפאבליקאנער קעגנער איז ביזנעסמאן טים שיהי, אנקעטע נאך אנקעטע ווייזן אז שיהי האלט אן א אויבערהאנט העכער טעסטער פון צווישן 5-7%.
אויב זאלן די רעפאבליקאנער אויפפיקן דעם זיץ און נישט פארלירן קיין אנדערע זיצן האבן זיי א 51-49 מערהייט.
אהייאו
אינקאמבענט דעמאקראט שעראד בראון לויפט פאר א פערטע טערמין אין די רויט געווארענע אהייאו, זיין קעגנער איז ביזנעסמאן בערני מארענאו, אנקעטעס ווייזן א גאר שמאלע פארמעסט מיט בראון ליעדן מיט בערך א פראצענט.
אויב זאלן די רעפאבליקאנער אויפפיקן דעם זיץ און נישט פארלירן קיין אנדערע זיצן האבן זיי א 52-48 מערהייט.
נעוואדע
אינקאמבענט דעמאקראט דזשעקי ראזען לויפט פאר א צווייטע טערמין אין די סווינג סטעיט נעוואדע נאכן ארויסשטויסן אין 2018 רעפאבליקאנער סענעטאר דיען העלער, איר קעגנער איז וועטעראן סעם בראון.
אנהייב פארמעסט האט אויסגעזעהן אז בראון האט א שטארקע שאנס צו ארוישטויסן ראזען, און רעפאבליקאנער האבן דאס אנגעקוקט ווי איינע פון זייער בעסטע אפערטונעטיס, למעשה ווי שפעטער אין די פארמעסט האט עס אנגעהויבן צו שיפטן צו די דעמאקראטישע זייט, די עוורעדזש פון אנקעטעס געבן א באקוועמע אויבערהאנט פון בערך 5-8% פארן דעמאקראט ראזען.
אריזאנע
דעמאקראטיש געווארענע אינדעפענדענט קירסטן סינעמע לויפט נישט פאר ריעלעקשאן.
אויף די דעמאקראטישע זייט לויפט קאנגרעסמאן ראובן גאיעגא, אויף די רעפאבליקאנער זייט לויפט געוועזענע גאווערנער קאנדידאט'קע און פייערדיגע טראמפ שטיצער קערי לעיק.
אזוי ווי אין נעוואדע האט די פארמעסט אנגעהויבן פאר צו די דעמאקראטישע ריכטונג, די עוורעדזש פון די אנקעטעס געבן א באקוועמע אויבערהאנט פון בערך 6-7% פארן דעמאקראט גאיעגא.
עס בלייבט נאר איבער צו זעהן סיי אין נעוואדע און סיי אין אריזאנע ווי טראמפ לויפט אסאך שטערקער ווי די רעפאבליקאנער סענאט קאנדידאטן צו ער וועט באווייזן זיי מיטצושלעפן צו א געווינס אדער כאטש א שמאלערע פארלוסט.
פענסילוועניא
אינקאמבענט דעמאקראט באב קעיסי לויפט פאר א פערטע טערמין אין די גאר וויכטיגע סווינג סטעיט פענסילוועניא, קעגן העדזש פאנד מענעדזשער דעיוו מעקארמיק, קעיסי האט געווינען זיינע ערשטע דריי טערמינען מיט גאר שטארקע נאמבערס פון צווישן 10-20% און ווערט געזעהן אלס א גאר שטארקע אינקאמבענט, די גרויסע אבער איז אז דאס איז די ערשטע מאל וואס ער לויפט צוזאמען מיט טראמפ אויף די בעלאט, און פענסילוועניא איז איינס פון די בלויע וואנט סטעיטס וואס טראמפ האט באוויזן אריבער צו שלעפן אויף זיין זייט אין 2016 אבער עס שמאל פארלוירן אין 2020, לויט רוב אנאליסטן גייט פענסילוועניא זיין די טיפינג פוינט סטעיט אין די יעצטיגע פרעזידענט פארמעסט.
אנהייב פון די פארמעסט האט טאקע אויסגעזעהן ווי רעפאבליקאנער קענען קדיש זאגן אויף סיי וועלכע שאנסן צו געווינען דעם זיץ, אבער ווי שפעטער אריין אין די פארמעסט האט מעקארמיק באוויזן צו פארמאכן די גרויסע געפ, און געוויסע האבן שוין די חוצפה צו זאגן אז רעפאבליקאנער קענען האבן א שאנס צו געווינען די זיץ.
די עוורעדזש פון די אנקעטעס געבן א שמאלערע אויבערהאנט פאר קעיסי פון בערך 2-4%.
וויסקאנסאן
אריבער קיין וויסקאנסאן לויפט די אינקאמבענט דעמאקראט טעמי באלדווין פאר א דריטע טערמין קעגן ביזנעסמאן עריק האוודע, אביסל ווי אין פענסילוועניא האט באלדווין געהייסן צו זיין א שטארקע אינקאמבענט, אבער לעצטערע אנקעטעס האבן גאר שטארק פארשמעלערט איר אויבערהאנט, און מיט טראמפ אויף די בעלאט לייגן רעפאבליקאנער גאר שטארקע האפענונג צו באזיגן באלדווין.
די עוורעדזש פון די אנקעטעס געבן א שמאלע אויבערהאנט פון בערך 1-3% פאר באלדווין.
מישיגען
אינקאמבענט דעמאקראט דעבי סטעבענאו לויפט נישט פאר ריעלעקשאן.
אויף די דעמאקראטישע זייט לויפט קאנגרעספרוי עליסע סלאטקין, אויף די רעפאבליקאנער זייט לויפט געוועזענע קאנגרעסמאן מייק ראדזשערס.
מישיגען אסאך ווי די פאריגע צוויי סטעיטס וואלט נישט געווען ערענסט אין פלעי ווען נישט טראמפ איז אויף די בעלאט, רעפאבליקאנער לייגן אסאך האפענונג אז די טראמפ פאקטאר צוזאמען מיט דאס וואס עס איז א אפענע פארמעסט קען זיי העלפן אריבערשלעפן די זיץ, די עוורעדזש פון די אנקעטעס געבן א אויבערהאנט פון בערך 3-5% פארן דעמאקראט סלאטקין.
מערילענד
אינקאמבענט דעמאקראט בען קארדין לויפט נישט פאר ריעלעקשאן אין די שטארק בלויע מערילענד, אין א זיץ וואס מען וואלט אפילו נישט געדארפט רעדן פון, די פאפולערע געוועזענע רעפאבליקאנער גאווערנער לערי האוגן האט אבער באשלאסן צו פראבירן זיין מזל צו לויפן, אויף די דעמאקראטישע זייט לויפט אנגעלע אלסעברוקס.
למעשה ווייזן אלע אנקעטעס א ברייטע אויבערהאנט פאר אלסעברוקס.
טעקסעס
סענעטאר טעד קרוז לויפט פאר ריעלעקשאן אין טעקסעס, קעגן דעמאקראט קאלין אלרעד, דעמאקראטן האבן שוין אין 2018 אומסוקסעספול פראבירט אראפצוזעצן קרוז, און יעצט מיט טראמפ אויף די טיקעט דארף עס צו זיין נאך שווערער.
די זיץ איז כמעט די איינציגסטע רעפאבליקאנער זיץ אויף וואס די דעמאקראטן האלטן אז זיי האבן בכלל א שאנס צו פליפן, און קרוז ווערט געזעהן אלס היפשער פעיוועריט, די עוורעדזש פון די אנקעטעס געבן א 3-5% אויבערהאנט פאר קרוז.
פלארידע
רעפאבליקאנער סענעטאר ריק סקאט לויפט פאר א צווייטע טערמין קעגן דעמאקראט דעבי מעקארסעל-פאועל, סענעטאר סקאט האלט אן א באקוועמע אויבערהאנט אין די געוועזענע סווינג סטעיט פלארידע פון בערך 5-6%.
אין 2018 איז פלארידע געווען פון די איינציגסטע רעפאבליקאנער איבעראשונגען נאך וואס סקאט האט ארויסגעשלעפט א גאר שמאלע געווינס, און די דעמאקראטן האבן פאר א שטיק צייט געחלומט אז די פארמעסט קען נאכאמאל זיין נאנט, אבער מיט די יעצטיגע מציאות אז פלארידע איז שוין א געהעריגע רויטע סטעיט וועט עס זיין גאר שווער פאר די דעמאקראטן ארויסצושטויסן סקאט.
נעברעסקע
אינקאמבענט סענעטארשע דעב פישער איז נישט געווען ערווארטעט צו האבן סיי וואספארא פראבלעם צו געווינען ריעלעקשאן, דעמאקראטן האבן אבער גענומען אינקאמבענט דען אסבארן צו לויפן קעגן איר, און האפן צו ארויסשלעפן א געווינס אין די טיף רויטע נעברעסקע.
עס זענען נישט דא קיין סאך אנקעטעס פון פראפעסיאנאלע פאולסטערס איבער די פארמעסט, אבער פון די ביסל - מערסטנס פארטיזן - אנקעטעס האלט פישער אן א גאר שמאלע אויבערהאנט.
עס איז זייער שווער צו זעהן אסבארן ארויסשלעפן א געווינס, אבער עס איז נישט אויסגעשלאסן.
