האט די רעגירונג געהעקט מייקל העיסטינג'ס קאר?
פלוצלונג, האט ער געשפירט ווי עפעס איז זייער נישט בסדר.
קודם האט ער געמיינט אז עס דאכט זיך אים נאר, אבער פון סעקונדע צו סעקונדע האט ער געשפירט מער און מער ווי ער פארלירט די שליטה איבער די קאנטראל'ס פונעם קאר. ער האט פראבירט נייגן דאס רעדל עטוואס רעכטס, לינקס, אבער ווי גארנישט. דער קאר האט אים פשוט נישט געפאלגט, שמייסנדיג ווייטער אין א גראדע ליניע, ווי גלייך עפעס א כוח וואלט אפגעטיילט דאס רעדל פון די רעדער.
אין אנגסט האט ער געדרוקט די ברעיקס אפצושטעלן דעם קאר, אבער עס האט איינפאך נישט געווירקט. דער קאר איז געפלויגן פאראויס ארויס פון יעדן קאנטראל, ווי געטריבן דורך א בייזער גייסט.
דאס איז עס, האט מייקל געקלערט צו זיך. די חברה האבן מיר געפאקט.
נישט לאנג בעפאר, האט ער געהאט געהערט אז די נייערע סארט מאדערנע קאר'ס קענען ווערן געהעקט, פונקט ווי א קאמפיוטער, און געפירט ווערן פונדערווייטנס דורך'ן העקער. א זאך וועלכע איז שוין זינט דאן אויפגעוויזן געווארן מער ווי איינמאל.
מייקל האט נישט געהאט קיין השגה וועלכע אגענטור עס איז אצינד אויף זיינע שפורן, דער NSA, CIA אדער FBI, אבער עס איז אים געווען קלאר איין זאך: ער מוז זיך ארויסזען פונעם קאר פאר יעדן פרייז.
די טירן זענען געווען פארשלאסן, פארשטייט זיך. דער אנאנימער העקער האט זיכער געמאכט אז זיין קרבן זאל נישט קענען גלאט אזוי ארויסשפרינגען.
נאך איידער מייקל האט געקענט זוכן א צווייטער וועג ארויס, האט דער קאר זיך גענומען שמייסן אויפ'ן העכסטן טעמפא, פליענדיג שנעלער און שנעלער, ביז'ן מאכן א שארפע דריי אראפ פונעם שטראז, און אריינגעקראכט אין א טייטלבוים וועלכע איז געשטאנען ביי דער זייט פונעם שטראז.
מייקל'ס קאר האט תיכף עקספלאדירט אין א העלישע פייער. ווידיא
***
ביז אהער איז די קאנספיראציע טעאריע...
קאנספיראציע? נישט ממש. כ'מיין, ס'ווענדט זיך וועמען איר פרעגט.
אויב איר וועט פרעגן דער לאס אנזשעלעס פאליציי דעפארטמענט, אדער דער עף בי איי, וועלן זיי פה אחד זאגן אז דאס איז א פאלנע קאנספיראציע טעאריע. געהעקט געווארן? קיינמאל נישט! איי, וואס דען האט צוגעברענגט מייקל העיסטינגס' פאטאלע עקסידענט אינמיטן נאכט? דא צוטיילן זיך שוין די דעות.
דער קאראנער האט היבש קלאר געזאגט אז קיין שום דראג'ס וואס וואלטן אפשר געקענט זיין פאראנטווארטליך פאר זיין פארלוירענעם קאנטראל זענען נישט געפינען געווארן אין מייקל'ס קערפער, חוץ פון צוויי סארט מילדע סובסטאנצן וועלכע געפינען זיך איינפאך אין ריטעלין, א מעדיצין וואס מייקל פלעגט רעגלמעסיג נעמען, אבער די טיפישע צייטונגען, וועלכע זוכן זיך נישט קיין קאנטראווערסיעס האבן אלע געשריגן מיט ריזיגע העדליין'ס אז עס איז געפינען געווארן דראג'ס אינעם קערפער פונעם פארשטארבענעם זשורנאליסט. משה זוך מיך. האבן זיי דען געשריבן ליגנט? ניין! איז וואס פייניגסטו, דו קאנספיראציע טעאריקער...
אבער אויב וועט איר פרעגן מייקל'ס פריינט אינערהאלב ראולינג סטאון, זאלט איר בעסער אכטונג געבן וויאזוי איר רעדט. זיי וועלן אייך שוין איינמאל איבערצייגן, מיט הויפנס פון באווייז, אז מייקל העיסטינגס איז בארבאריש אומגעברענגט געווארן אין א אויסגעפלאנטער אקציע דורך די רעגירונג, אין א בייזווייליגן שריט צו פארמאכן איינמאל פאר אלעמאל דאס מויל פון אט דעם חוצפה'דיגן רעפארטער וועלכער האט זיך גענומען א ציל אויפצודעקן די אמת'ע שלייערן פון אמעריקאנע רעגירונגס איינגעשטעלטע.
דער ערשטער שריט פון די פאליציי וואס האט אויפגעוועקט חששות איז געווען ווען זיי האבן זיך אנטזאגט ארויסצוגעבן דעם קערפער פאר מייקל'ס פאמיליע, טראץ נאכאנאנדע געבעטן. און נאך עטליכע טעג ווען דער קערפער איז ענדליך יא צוריקגעקערט געווארן, האט זיך ארויסגעשטעלט אז דער קערפער איז גענצליך פארברענט געווארן אין א קרעמעטאריום, טראץ דעם וואס די פאמיליע האט קאטאגאריש פארלאנגט אז זיי זאלן עס נישט טוהן.
דאס איז געווען ממש פארדעכטיגט, ווי איינער זאל ווען זוכן אויסצומעקן עפעס באווייז.
דערנאך איז געווען גאר מאדנע דאס וואס אנשטאט וואס דער פאליציי אדער עף בי איי זאל עפענען אן אויספארשונג איבער דעם גאר מיסטעריעזן עקסידענט, האבן זיי באלד אין אנהייב געזאגט אז עס איז נישט פארהאן קיין סיבה אויסצופארשן ווען אלעס איז אזוי קלאר... א פשוט'ער עקסידענט, זיך אנטזאגנדיג פון אריינגיין טיפער אין סיי וועלכע פראגע. זיי האבן אפילו נישט געוואלט אריינלאזן קיין נייעס רעפארטער אין זייער סטאנציע צו דעקן דעם געשיכטע.
פארוואס האבן זיי זיך אזוי געיאגט צו ציען מסקנות אינעם ריכטונג פון אן עקסידענט?
א צווייטער גאר פארדעכטיגטער געשעעניש איז געווען ווען מייקל'ס פרוי, וועלכע האט פון אנהייב, באלד נאכ'ן עקסידענט, פארפירט אז זי וועט נישט רוען ביז זי וועט ארויפגיין אויף די שפורן פון דעם יעניגן וועלכע האט אומגעברענגט איר מאן, האט פלוצלונג, פון איין טאג צום צווייטן, געטוישט איר טאן, און געענטפערט פאר יעדן איינעם אז עס איז געווען א פשוט'ער עקסידענט, אזויווי דער פאליציי האט געזאגט. עס האט קלאר אויסגעזען ווי איינער האט איר געסטראשעט און געצוואונגען אזוי צו זאגן.
און נאך א שאקירנדע קרישקעלע, אויב וויקיליעקס איז עפעס באגלייבט פאר אייך, האבן זיי, געציילטע שעה נאכ'ן עקסידענט, געשריבן אז מייקל העיסטינגס האט זיך געהאט פארבינדן מיט זיי עטליכע שעה בעפאר דעם עקסידענט און געזאגט אז דער עף בי איי האט געעפנט אן אויספארשונג אויף אים.
אבער דער גרעסטער קשיא פון אלעס, איז ווארשיינליך געווען: וויאזוי האט דער עקסידענט פאסירט?
צושויער האבן געזאגט אז זיי האבן געזען דעם קאר קומען צופליען גאר שנעל, מאכן עטליכע קליינע שפרינגען, אריינקראכן אינעם בוים, און אויפרייסן אין אן עקספלאזאציע.
אבער פארוואס זאל מייקל פליען אזוי שנעל? איז ער אנטלאפן פון איינעם? עס האט נישט אזוי אויסגעקוקט.
און זינט ווען טוט א קאר עקספלאדירן אזוי שנעל פון א בלויזן עקסידענט? ”פון היינט און ווייטער,” האט איינס פון די רעפארטער'ס אין ראולינג סטאון זיך געאייסערט, ”וועט קיינער מער נישט קויפן קיין מערצעידעס אויטא! חוץ אויב דער פאליציי וועט מודה זיין אז דאס איז נישט געווען קיין פשוט'ער עקסידענט!”...
און פון דער צווייטער זייט, איז געווען גענוג און נאך סיבות צוליב וואס דער רעגירונג זאל אים וועלן זען טויט אין א טראגישער קאר עקסידענט.
מייקל העיסטינגס איז געווען פון די מערסט אגרעסיווער זשורנאליסטן וועלכע האבן כסדר געצימבלט פרעזידענט אבאמא פאר זיין אזויגערופענעם ”מלחמה קעגן זשורנאליזם”.
אין יענע יארן זענען ווייסע הויז זשורנאליסטן מער און מער געצוימט געווארן, ווען דער אבאמא אדמיניסטראציע האט געזוכט זיי ענג צו מאכן אויף טריט און שריט, פארבאטנדיג פאר זייערע קוועלער צו רעדן צו די רעפארטער'ס אזוי פריי ווי זיי פלעגן רעדן ביז היינט.
טייל קוועלער האבן אינגאנצן אויפגעהערט קאמוניקירן מיט די זשורנאליסטן, א זאך וואס האט פארשטייט זיך געברענגט א פלייץ פון טענות מצד דעמאקראטיע גענויגטע רעפארטער'ס וועלכע האבן פארפירט אויף זייערע פלאטפארמע'ס, פארגלייכנדיג דעם צושטאנד אינעם ווייסן הויז צו לענדער ווי צפון קארעא און רוסלאנד, וואו דער פרעסע מעג בלויז שרייבן וואס עס שמעקט פאר די רעגירונג.
מייקל העיסטינגס איז אפילו געגאנגען א שטאפל ווייטער, ווען ער געסטראשעט די אבאמא אדמיניסטראציע אז אויב דער סיטואציע וועט ווייטער אנגיין, וועלן די רעפארטער'ס דערקלערן קריג קעגן דעם רעגירונג...
אבער נישט דאס איז געווען וואס האט געמאכט מייקל העיסטינגס פאר אזא דארן אין אויג פון די רעגירונגס אגענטורן.
וואס יא?
נישט לאנג בעפאר, האט אן ארטיקל אין ראולינג סטאון, געשריבן דורך מייקל העיסטינגס, פאראורזאכט א מאסיווע, נאציאנאלע סענזאציע נאך וועלכע איינס פון די גרעסטע אמעריקאנער גענעראלן, סטענלי מעקריסטאל, דער ארמיי קאמאנדיר וועמען פרעזידענט אבאמא האט געשיקט פירן דעם קריג אין אפגאניסטאן, איז געווען געצוואונגען צו רעזיגנירן פון אמט.
דאס איז געקומען נאך עטליכע חדשים וואס מייקל העיסטינגס האט געוויילט אויף די פראנט ליניעס אין אפגאניסטאן און געווארן נאנט באפריינדעט מיט'ן גענעראל און זיין סוויטע. גענוג נאנט אז זיי זאלן נישט היטן זייער צונג אין זייער געגנווארט, נישט אין אכט נעמענדיג אז מייקל פארשרייבט אלעס אין זיין ביכעלע.
לכתחילה האט מייקל בלויז געדארפט באריכטן דארט פאר א קורצע צייט און באלד צוריקפליען קיין אמעריקע, אבער דאן האט דער אייסלאנד וואולקאן אויפגעריסן, ווי די עלטערע ליינער געדענקען נאך, פארקריפלענדיג דעם גאנצן פלי סיסטעם, און מייקל איז געבליבן שטעקן אין אפגאניסטאן.
אין זיין ארטיקל, האט מייקל העיסטינג, צווישן אנדערע זשורנאליסטישע אבזערוואציעס איבער דעם מלחמה אין אלגעמיין, ציטירט עטליכע קאמענטארן וואס דער גענעראל האט געלאזט פאלן, וואו ער מאכט אוועק דעם מיליטערישן סטראטעגיע פון אמעריקע אין אפגאניסטאן, אפ'חוזק'נדיג פונעם פרעזידענט'ס גאנצע אויסערן פאליסי און בכלל פון דער אבאמא אדמיניסטראציע, אריינגערעכנט עטליכע ביליגע וויצן אויף וויצע פרעזידענט ביידען'ס חשבון.
דער ארטיקל האט אויפגעוואכט א שטורעם, שטעלנדיג אונטער פראגע צייכן דעם גאנצן צוקונפט פונעם סטראטעגיע אינעם קריג אין אפגאניסטאן, און פרעזידענט אבאמא האט אריבערגערופן דעם גענעראל צום ווייסן הויז, וואו יענער האט איבערגעגעבן זיין רעזיגנאציע.
מאנכע האבן אפלאדירט דעם געוואגטן זשורנאליסט פאר זיין אויפריכטיגקייט אין באריכטן אויטענטישע, אומצענזורירטע נייעס, א שליסל אין א דעמאקראטישער געזעלשאפט, בעת די מערהייט פון זשורנאליסטן, רעגירונגס איינגעשטעלטע און סתם עמך גוים האבן געהאלטן אז מייקל העיסטינגס האט איבערגעצויגן דעם שטריקל.
מייקל זעלבסט האט נישט געהאט גע'חלומ'ט וואס זיין ארטיקל וועט אנמאכן, אבער אצינד איז שוין געווען צו שפעט.
מיט א צייט שפעטער, איז ער ארויף אויף א פרישן, ענליכן געשיכטע מיט איינס פון די סי איי עי הויפטן, און ער האט זיך נישט געקענט איינהאלטן פון אריינגיין טיפער דערין, כאטש וואס ער האט געוואוסט אז ער שפילט זיך מיט פייער.
בלויז איין טאג איידער דעם עקסידענט, האט ער געשריבן צו זיינע ידידים אין ראולינג סטאון מאגאזין אז היות ער איז ארויף אויף עפעס ריזיג, וועט ער מוזן ארבעטן אונטער דער ראדאר פאר די קומענדיגע שטיק צייט.
דער נעקסטער זאך וואס זיי האבן געהערט איז געווען אז מייקל איז גע'הרג'עט געווארן אין א טראגישן קאר עקסידענט.
נו, זענען זיי טאטאל צודרייט פאר'ן טראכטן אינעם ריכטונג פון א געפלאנטער מארד?
***
אבער ווי ביי יעדן קאנספיראציע טעאריע, איז קודם כל וויכטיג צו צוטיילן צווישן פאקטן און ווארשיינליכקייטן.
דער פאקט אז א קאר קען געהעקט ווערן, איז אויפגעוויזן געווארן אויסער יעדן צווייפל, בעת אלע אנדערע הסברים בנוגע דעם עקסידענט לייגן זיך נישט אויפ'ן שכל.
דער פאקט אז אומצאליגע רעגירונגס איינגעשטעלטע האבן געציטערט פון מייקל העיסטינגס און זיין לאנגן נאז, איז אויך אויפגעוויזן געווארן.
דער שאלה איז נאר, צי די דאזיגע רעגירונגס איינגעשטעלטע האב טאקע געהעקט מייקל'ס קאר, און פון דא און ווייטער איז שוין אלעס ווארשיינליכקייטן, כאטש וואס אויף ביידע וועגן זענען פארהאן מער פראגעס ווי ענטפער'ס.
אלענפאלס, וואס לערנען מיר זיך פון דעם געשיכטע?
אז מען הויבט זיך נישט אן מיט די חברה!