Авайвилиз хьурай лянет, кур байкъуш, Ви а мурдар суфат низ хьуй бес къе хуш? Гъилер, беден ивид курут, келле буш, Бес мус жеда са гьакь-дуван, къарагъун?
Яхул бармак чIулав рекьел пIир хьана, Чи хуьр, уба вирина, уф, чIур хьана. Ругун чIугвар рат рушарин хур хьана, Бес гьикьван хьуй и хар, тIурфан, къарагъун?!
Агъадиз
Вун иблис я, шейтIан я вун гунагькар, Чиркин я руьгь, туькьуьл я мез ви, агъа. Кесиб саймиш тийиз, гьилле я ви кар, Аквадач вун гьич дуьз рекьяй къвез, агъа.
Вун зулумкар, жаллатI ятIа инсафсуз, Жуван дели кьил гьамиша яхъ агъуз. Ви гелер я харапIаяр гьар юкъуз, Писвилерив михьи рикIер нез, агъа.