Мусибатнаме
Сенфиз ширин ксанвай зун,
Ажайиб ахвар акуна.
Амукьна зун тах атIана,
Бедендик зурзун кутуна.
Чуьнгуьр ягъа, шехьа Мелик,
Вегь вилерлай ивид селер.
Чуьнгуьр ягъа, лагьа Мелик,
Хабардар хьуй вири эллер.
Теймурленгдин кафтIар суьруь
Ахъа хьанва инихъ вири.
Къилинждалди къирмишнава –
Тунач инра са затI дири.
Чуьнгуьр ягъа, шехьа Мелик,
Вегь вилерлай ивид селер.
Чуьнгуьр ягъа, лагьа Мелик,
Хабардар хьуй вири эллер.
КукIварнава зи паб, аял,
Гьич са касдиз ганвач мажал.
Ивидикай лахта хьанва –
Ихьтин са гьал гъанва вахал.
Шехьа Мелик, шехьа Мелик,
Вегь вилерлай ивид селер.
Чуьнгуьр ягъиз лагьа Мелик:
Ивид кьунва дигай чуьлер.
Я югъ хьанач, я секин йиф,
ЦIуд къуз абру женг авуна.
Куьред къеле къачун патал
Душманри чун денг авуна.
Чуьнгуьр ягъа, шехьа Мелик,
Вегь вилерлай ивид селер.
Чуьнгуьр ягъа, лагьа Мелик,
Къирмиш хьана вири эллер.
Акакьнач абурук чи гуж,
Къати хьана татаррин гьуьж.
Кьар пад къуна душманри –
Хьана элдиз тежедай гуж.
Чуьнгуьр ягъа, шехьа Мелик,
Вегь вилерлай ивид селер.
Чуьнгуьр ягъиз лагьа Мелик:
Ивид кьунва дигай чуьлер.
ВацIарин яд яру хьана,
Булахарни кьару хьана.
Къирмиш хьанвай игидрикай
Шумудни сад хару хьана.
Шегьа Мелик, лагьа Мелик,
Вегь вилерлай ивид селер.
Чуьнгуьр ягъиз лагьа Мелик:
Ивид кьунва дигай чуьлер.
Эсир хьанвай инсанрикай
Малар нехир туькIуьрнавай.
Суьруьяр хьиз чун – инсанар
Куьред кIеледиз гьалзавай.
Шехьа Мелик, шехьа Мелик,
Килиг кватIа чун нин вилик?!
Теймурленгдиз лянет ая,
Чуьнгуьр яхъа вуна гъилик.
КIеле гьатна адан гъиле,
Къирмишна халкь, ийиз гьилле.
Терг авуна гуьзел мескен,
Тунач са кIвал, са хуьр чиле.
Чуьнгуьр ягъа, шехьа Мелик,
Вегь вилерлай ивид селер.
Лагьа Мелик, лагьа Мелик,
Къирмиш хьана вири эллер.
Им ахвар туш, гьакъикъат я,
Бейил чавуш са къамат я.
Ада кьуна явашдиз зун –
Лугуьзава – саламат я.
Чуьнгуьр ягъа, лагьа Мелик,
Акъваз мийир, алад вилик.
Ван тур вуна дагъ-дереда,
ЦIай кутур на элдин рикIик.
Буьркьуь я зун, амач вилер,
Аквазамач кIвалер, чилер.
Хкаж жезва кицIер ванер –
Гумад кьунва, кузва хуьрер.
Шегьа Мелик, лагьа Мелик,
Буьркьуьвурдаз агьа, Мелик.
Чуьнгуьр ягъа, лагьа Мелик:
Къирмиш хьана вири эллер.
Бейилани лугуьзава:
- ЧIехи устIар, умуд вак ква.
Лагь виридаз, чара ая -
Чи дердерин дава вав гва.
Шехьа Мелик, лагьа Мелик,
Буьркьуьвурдаз агьа, Мелик.
Чуьнгуьр ягъа, лагьа, Мелик:
Къирмиш хьана вири эллер.
Гуж це вуна ви гъилериз,
Ван чукIура чи чуьллериз.
АквазмачтIан ви вилериз –
Чи гьалдикай лагь эллериз.
Чуьнгуьр яхъа вуна гъиле,
Юкьва кутIун хци къеме.
Теймурленгаз лянет ая –
Акъваза вун халкьдин кьиле.
Буьркьуь вилер кутIун, Мелик,
РикIяй килиг и дуьньядиз.
Шегьер, хуьрер цIивин хьанва,
Гуж авунва чи Куьредиз.
Зи хиялри чан гана заз,
ЦIийи къуват,ван гана заз.
ЭкъечIна зун элдин вилик
Яракьарни низамдаваз.
Шегьа Мелик, лагьа Мелик,
Вегь вилерлай ивид селер.
Лагьа Мелик, лагьа Мелик:
Къирмиш хьана вири эллер.
Ван туна за чи дагълара,
ЦIайлапан кана цавара.
Паракь-паракь чкIана сес –
Къекъвена ам чи багълара.
Шехьа Мелик, шехьа Мелик,
Акъвазмийир, алад вилик.
Ван тур вуна дагъ-дереда,
ЦIай кутур на элдин рикIик.
Хьана зурба, чIехи cа женг,
Хьелерин марф кьвана тенг-тенг.
Къеме, къилинж аваз гъиле
Физавай чун тавуна ленг.
Шегьа Мелик, лагьа Мелик,
Вегь вилерлай ивид селер.
Чуьнгуьр ягъиз лагьа Мелик:
Ивид кьунва дигай чуьлер.
Гьар патахъай къвезвай душман,
Кьадар-гьисаб авачиркьван.
Чи кьегьалри женгер тухуз,
Мердвилелди гузавай чан.
Чуьнгуьр ягъиз шехьа Мелик,
Вегь вилерлай ивид селер.
Чуьнгуьр ягъиз лагьа Мелик,
Къирмиш хьана вири эллер.
Муьжуьд виш суз мескен хьайи
Азиз Ватан чIур хьана зи.
Нурдин кьве вил буьркьуь хьана,
Ачух дуьнья сур хьана зи.
Шехьа Мелик, шехьа Мелик,
Вегь вилерлай ивид селер.
Чуьнгуьр ягъиз лагьа Мелик,
Нурда амач лекьрен вилер.
Душманариз эсир хьана
Шумуд игит, шумуд гуьзел.
Акурбурун рикIер кана,
Ивид накъвар ала вилел.
Чуьнгуьр ягъа, шехьа Мелик,
Вегь вилерлай ивид селер.
Чуьнгуьр ягъиз лагьа Мелик,
Хабардар хьуй вири эллер.
МуьтIуьгъ тахьайбурун кьилер
АтIуз кIватIна хуржунириз.
Акъуднава гьикьван вилер,
Хъченва ви цавуз, чилиз.
Шехьа Мелик, шехьа Мелик,
И дердериз эха Мелик!
Нурдин вилер буьркьуь ятIан,
Дуьньядиз вун рикIив килиг.
Ивид селер хьана вацIар,
Чи рикIериз яна кьацIар,
Теймурленгдиз лянет ая,
Я иллагьи, я чан гъуцар.
Чуьнгуьр ягъа, шехьа Мелик,
Вегь вилерлай ивид селер.
Чуьнгуьр ягъа, лагьа Мелик,
Хабардар хьуй вири эллер.
Куьре хьанва са кап рехъвер,
Несиб туш чаз рахунар, хъвер.
Душмандин и зулумриз куьн
Шагьид хьухь я цавар, чилер.
Шехьа Мелик, шехьа Мелик,
Буьркьуь хьунни эха Мелик.
Чуьнгуьр ягъа, лагьа Мелик,
Хабардар хьуй вири эллер.
Вилин накъвар хьана селер,
Гьинава куьн, я чан эллер?!
Иви кIвахьиз хуржунрава
Чи кьегьалрин атIай кьилер.
Шехьа Мелик, шехьа Мелик,
И дердериз эха Мелик.
Нурдин вилер буьркьуь ятIан,
Дуьньядиз вун рикIив килиг.
Дагъ-дереяр ясда ава,
Хьанач элдиз дарман, дава,
Душманари гуж авуна,
Я чан гъуцар, куьн гьинава?!
Шехьа Мелик, шехьа Мелик,
Теймурленгаз агьа Мелик.
Чуьнгуьр ягъа, лагьа Мелик,
Хабардар хьуй вири эллер.
Куьре кана, Куьре Мелик,
Вун Ватандин гьалдиз килиг.
Женнет хьтин гуьзел мекан
ХарапIа я душманд вилик.
Чуьнгуьр ягъиз шехьда Мелик,
Гьикьван дердер эхда, Мелик?!
Экуь дунья мичIи я заз –
И карди рикI тIехвда, Мелик.