Van my rekenaar...

En so het 2022 ook met 'n spoed sy einde bereik en 2023 het ons met 'n slag getref. Ek weet nie van jou nie, maar eerstens was verlede jaar (hoe lekker val dit nie op die oor nie!) nie die beste jaar vir my nie en tweedens het ek nie al my doelwitte bereik wat ek beplan het nie.

    Maar nou ja, tyd wag vir niemand nie, so hier's ons al in die tweede maand van hierdie spiksplinternuwe jaar met heelwat moontlikhede en - net om jou voete deeglik gegrond te hou - nuwe én ou probleme! 

En hoewel die jaar al volstoom aan die gang is, wil ons julle steeds in hierdie eerste nuusbrief van 2023 ’n voorspoedige en produktiewe jaar toewens.  

    Alle voorspoed en geluk vir 2023.

Daar's 'n nuwe Afrikaanse speler op die blok -

KIERANG GESELSPOPPE

Kierang Geselspoppe  is ‘n gesellige groep Afrikaanse geselspoppe wat besluit het om hul eie baas te wees en onder leiding van die hoofpop, Kierang - ja, die een met ‘n neus vir ‘n fees! - op hul eie te gaan om pret, plesier en sommer net feestelikheid in Afrikaans te versprei.

Maar wag, laat Kierang sommer liewer self vertel: "Ons het natuurlik so hier en daar ook ‘n paar mense ingetrek om die administrasie en harde werk te doen, soos e-posse te beantwoord en telefone te beman, die motor te bestuur en vertoningstoerusting op en af te laai en af te stof … want ons is mos poppe … en te belangrik om ons met sulke alledaagse moeite op te hou. 

"Ons gereelde motorbestuurder en menslike regterhand is Klaas Lakei, wat nogal toegelaat word om tydens ons optredes gesien te word … en sy verskillende stemme te gebruik … want onthou, ons is mos poppe. Maar noem hom sommer net Klaas, anders dink hy nou-nou hy is onmisbaar vir ons. En waar kom Klaas aan sy naam? Eenvoudig - ons het hom mooi laat verstaan wie is BAAS en wie is KLAAS in hierdie poppe-geselskap!

"Kom maak gerus 'n draai by ons webblad en ontmoet ons hoofbestuur wat my, Tant Toeka en Dok Doepa insluit. Daar's iets vir almal van elke ouderdom en funksie. Maar beste van alles - ons maak van alles 'n FEES!"

  Resep vir suksesvolle vryskutwerk

Op enige gegewe oomblik is daar meer as ‘n 100 miljoen mense dwarsdeur die wêreld wat vryskut werk. En as jy hierdie nuusbrief lees, is jy ook een van hulle. Maar om ‘n sukses as vryskut te kan maak, verg nogal heelwat omdat jy nie meer ‘n baas of maatskappy het om aan verantwoording te doen nie. Jy het net jouself en glo my, jy is jou heel ergste nagmerrie as ‘n baas!

'n Suksesvolle vryskut hou nooit op leer nie. En ek dink die definisie van sukses bly 'n kwessie van perspektief, so ek deel graag van die wenke wat ek deur die 30 jaar wat ek al vryskut werk, langs die pad opgetel het. Vryskut is dalk een van die beste besluite wat ek ooit geneem het, hoewel dit oorspronklik deur nood gebore is. Maar ek hou van die buigsaamheid, onafhanklikheid en beheer wat ek het oor die moeite wat ek doen en die uitkoms van al daardie moeite. Maar voordat jy dink dit klink dalk nes die Paradys – daar is heelwat landmyne en hindernisse in jou pad. En wanneer jy vir jouself werk, dra jy die las van enige slegte besluit of fout – daar’s niemand anders om die skuld voor te gee nie. So, hier is net 'n paar dinge wat ek eerstehands geleer het:

Lees die volledige artikel op ons webblad.

Oorleef beurtkrag in jou tuiskantoor

Nou ja, daar het toe gebeur… Fase 8-beurtkrag loer om die hoek en menige vryskutskrywer en tuiskantoorwerker voel asof die mat onder hul voete uitgeruk is. 

     Anders as met ‘n groot maatskappy waar jy (1) ‘n maandelikse salaris kry en jou dus nie veel daaraan steur as die krag vir 5 ure of langer gedurende werksure af is nie, of (2) waar jou maatskappy die luukse van ‘n reuse kragopwekker het wat inskop net sodra Eskom se krag uitskop, is die eenpersoonbesigheid verskriklik afhanklik van elektrisiteit om die tuiskantoortjie aan die gang te hou.

     Sonder krag in ‘n tuiskantoor staan álles stil – skootrekenaarbatterye hou ook net ‘n paar ure en met die gevaarligte wat flikker oor Fase 8 en selfs hoër. Fase 8-beurtkrag beteken ons sal daagliks tot 14 uur sonder krag wees. En fase 10-beurtkrag kan beteken dat Suid-Afrikaners daagliks tot 16 uur sonder krag kan wees. Waar pas jou besigheid dan in?

Lees die res van die artikel op ons blog .