Jy lees elke dag koerant, maar raak vreeslik verergerlik as jy sien hoeveel tik-, spel- en stylfoute daar in 'n enkele berig is. Soveel so dat jy elke berig met jou rooi potlood stormloop en die talle foute omkring - net sodat jý kan beter voel.

Met jou liefde en aanvoeling vir taal en styl wéét jy dat 'n berig foutloos sou wees as jý dit onder hande kon neem. Jy en jou rooi potlood of  pen maak 'n gedugte span en familie en vriende kontak jou altyd eerste wanneer hulle 'n geskrewe stuk wil laat nagaan vir tik- of spelfoute. Jy't dus sommer klaar 'n reputasie vir proeflees-perfeksionisme.

Bedrewe proeflesers word byna daagliks deur mediagroepe, koerante, uitgewers, tydskrifte en privaat instansies gesoek om seker te maak hul geskrifte is sonder druk- of tikfoute voordat dit aan die volgende publikasiestap onderwerp word.

Klink dit soos die vryskutloopbaan vir jou? Dan moet jy sonder versuim vir ons kursus inskryf waar ons jou soveel moontlik kennis omtrent proeflees laat opdoen - met oorgenoeg praktiese ondervinding om jou te wys, eerder as om net te vertel.

Maar onthou... proeflesers is die laaste skakel in die redigeringsproses wat beteken daar is nie ruimte vir foute nie. Die proefleser se bydrae is die laaste - dit moet PERFEK gedoen word. En om seker te maak ons stuur werklik gekwalifiseerde proeflesers in die bedryf, is hierdie kursus se slaagsyfer minstens 95%. Hou dus in gedagte dat jy vir elke werkstuk soveel moet behaal om die kursus te kan slaag. Dit word dus aanbeveel dat jy dalk eers die Teksredigeringkursus voltooi voordat jy die proefleeskursus aanpak.

• Verskil tussen proeflees en redigering

• Proefleessimbole en hoe om hulle toe te pas

• Wat behels proeflees?

• Waarvoor om te kyk wanneer jy proeflees

• Konsekwente punktuasie

• Styl - syfers, afkortings, werkwoorde, voornaamwoorde, ens.

• Werk elektronies - Microsoft Word , internet, woordeboeke, sagteware

• Grammatikale wenke

• Onfeilbare bronne

• Die beste proefleeswenke ooit

• Waar en hoe om werk te kry